الدستور

طهقان زهقان متضايق

2006-10-03T04:17:00.000-07:00

هو أستاذ إبراهيم عيسي متنرفز ليه حد يعرف ؟؟

رغفين عيش في اليوم .. و النعمة رضا

2006-09-07T22:41:00.000-07:00

من الواضح أن السياسات في الدستور تسيير بالمبدأ المهيب "أنت قول اللي أنت عاوزه و أنا من حقي أسرقك"

فقد واصل عتاوله الدستور عنادهم المباركي مع أرتفاع أي صوت بالاعتراض علي الممارسات الغير آدمية التي يقوم بها الأساتذة رؤساء الأقسام ضد المحررين المعفنين اللي جايين من الشارع - راجع مقولات إبراهيم عيسي المشهورة-, الشهر ده فيه خمسة ستة قبضوا 15 جنية .. أنت بتقرأ صح خمسة عشر جنيهاً مصرياً لا غير و إذا كان عاجب أهلك !!!!

تصوروا الدستور تعطي لمحرريها المعينيين 15 جنية ثمن رغفين عيش بلدي كل يوم و يكلوهم حاف و من غير ما يدفعوا مواصلات, و بيقولولهم إن ده عشان خصم التأمينات منهم , لأن مرتبهم 150 جنية !!!!!!!!!!!!!!!!

تخيل يا محترم لما صحفي جاي من علي الرصيف- راجع نفس المقولات- و يأخد 150 جنية ده لو خدهم , و مع ذلك فحتي حكاية التأمينات دي مزورة لأن حق الصحفيين اللي أتعينوا أنهم يأخدوا زيادة في أساسي المرتب هي 10% و بحسبة بسيطة يطلع شوية العيال دول اللي جايين من علي الرصيف ليهم 165 جنية و بعد خصم 135 جنية يبقي الصحفيين المعفنيين اللي جايين من علي الرصيف ليهم كام؟؟؟؟؟؟؟

صح 30 جنية تخيلوا أنا تاعب نفسي و قاعد أكتب التدوينة الطويلة العريضة دي عشان 15 جنية فرق يعني عشان رغفين عيش زيادة في الشهر و مع ذلك برضه مش هنأخد ال15 جنية الفرق ليه؟!

عشان إحنا جينا من الشارع و لازم نرجع للشارع بالظبط زي النيل اللي يشرب منه لازم يرجعله !!!!!!!!!

أنا عارف إن كل ده هزيان بس لو شفتم منظر شباب زي الورد و هما ماشيين يفكروا هيكملوا الشهر إزاي بال15 جنية لازم تهزوا زيي بالظبط بصراحة خلص الكلام.

بس فاضل حاجة صغيرة يا ريت اللي ربنا مديله و مش شغال في الدستور و بيقبض أكثر من 15 جنية في الشهر يفتح الجزيرة علي برنامج الإتجاه المعاكس و يتابع ما قاله مساعد وزير الخارجية الأميريكي عن الإتنين اللي هو شايفهم مصدر تفاؤل لأمريكا في المنطقة و إنهم مؤمنيين فعلاً بالنموذج الأمريكي , أسبكم تتفرجوا و اللي زي حالاتنا كده و بيقبض 15 جنية في الشهر أقوله بقي و خلاص الإتنين هما سمير قصير و الأستاذ ..............لا مش السبكي... ده إبراهيم عيسي , و لو إني شايف إن ده تجني علي براهيم - مش مكتوبة غلط- لأنه ملوش علاقة بأمريكا و لازي ما عمرو سليم ما قال إنه بيحب الأمريكان زي عنيه و كمان لأن الراجل ده حمته أمريكا فترة من فترات حياته لما سافر و كتب مقتل الرجل الكبير و أكيد اللي يسافر أمريكا لازم يكرهها عموماً أنا مش هفتح الموضوع ده تاني عشان أنا قربت أنام و أنا بأتكلم فيه سلام بقي

عبير العسكري من عندنا

2006-08-31T08:05:00.000-07:00

مبروك يا عبير يا عسكري جائزة حرية الصحافة الدولية لأول مرة في تاريخ مصر , يا عبير المرة دي أنت من عندنا هنكتب عنك بس معلش من هنقدر نشتمك أو نرفدك أو نعلق إستقالتك علي الحيطة و نعلق عليها و نمنع إن حد يعلق عليها , هنكتب عنك من عندنا و معلش مش هنقدر نشتمك علي النت أو نشوه صورتك , معلش يا عبير إحنا بنحبك بس هو ده اللي نقدر عليه , فوزك يا عبير بالجايزة يؤكد للناس إنك أنت اللي علي حق مش هما مش اللي بيأكل حقوق المحررين و يشتم في الصحفيين بتوعه و يتهمهم بالعمالة للأمن بعد ما يسيبه جرنانه عبير الدنيا كلها قالت إنك علي حق ما تفكريش في كل الكلام الواطيء اللي بيتقال عبير العسكري هتفضل عبير العسكري علي الرغم من حقد الكثير . عبير مبروك .. مبروك .. و عقبال ما كل المحررين اللي أتأخد حقوقهم يأخدوا جوايز عشان يثبتوا إنهم أصحاب حق .. مبروك تاني يا عبير..

أسرة مدونة الدستور

http://www.cjfe.org/eng/awards/awards.html

منصور يا دستور مقهور يا مغمور

2006-08-31T04:43:00.000-07:00

في سابقة جديدة و فريدة و عبيطة قامت جريدة الدستور بنشر أرقام توزعها و كأنها بتقول للناس إحنا عايشين أهوه و زي ما أنتو عارفين محدش هيحاول يثبت شيء إلا إذا كان عليه لغط أو مشاكل أو هو حاسس إنه فعلاً بينهار , طيب بغض النظر عما حدث و باعتبار أن هذه الأرقام صحيحة و هي طبع 125000 نسخة يوم 19/7 و توزيع أكثر من مائة و عشرة ألف نسخة يعني مكسب هذا الأسبوع بدون الإعلانات يزيد عن المائة ألف جنية بما يعني أن الجريدة تحقق ربح شهري يتخطئ النص أرنب طب أحسبوها أنتو بقي لما المحرر يقبض 65 جنية و الجرنان فيه 30 محرر تقريباً يبقي مرتبات المحررين 1965 جنية !!!!! , و فلوس التليفونات لا تتعدي ال800 جنية و ورق الدشت 12 جنية في الشهر و كهرباء 100 جنية في الشهر و إنترنت 100 جنية يبقي المجموع 3000 جنية بالعافية يعني مرتبات المحررين و مصارفهم كاملة لا تتعدي 0.6 % من مكسب الجرنان الشهري و مع ذلك ترفض الجريدة أن تعطي المحررين حقوقهم ,طب سؤال بقي بتاع المتفوقين ليه إبراهيم عيسي ساكت علي اللي بيحصل و مش بيعترض و يزود فلوس العيال المحررين اللي جابهم من الشارع؟
Hint:مرتب إبراهيم عيسي من مؤسسات عصام إسماعيل فهمي يتجاوز 26 ألف جنية شهرياً – اللهم لا حسد قر بس-, اللي يعرف الإجابة له علبة لبان تشكلس

إعتذار

2006-08-30T07:10:00.000-07:00

نعتذر عن عدم الإشارة إلي مصدر حوار الأستاذ عمرو سليم و هو مجموعة المحروسة البريدية

شكوي خالد البلشي للنقابة

2006-08-29T03:55:00.000-07:00

شكوي الأستاذ خالد البلشي لنقابة الصحفيين بسسب تضرره مما حدث له من رفد تعسفي
نقلاً عن موقع الوعي المصري

رسومات عمرو سليم الممنوعة في الدستور

2006-08-29T03:38:00.000-07:00

عمرو سليم يحكي وقائع ما جري في الدستور

2006-08-28T11:07:00.000-07:00

كان الموعد مع رسام الكاريكاتير المتميز الفنان عمرو سليم في الثامنه مساءا بمقر روزا اليوسف ، قابلنا ببشاشته المعتاده واصطحبنا الى احد المقاهي القريبة من مقر روزا اليوسف لنبدأ معه حوارا كان من المفترض الا يزيد عن ساعة او ساعة ونصف بحد اقصى لكنه امتد الى اكثر من ساعتين ونصف ، كان للأزمة الأخيرة التي حدثت بجريدة الدستور مؤخرا نصيب الأسد من وقت الحوار .. كثير من الاسئلة حملتها وانا في الطريق الى عمرو سليم لكن الحديث عن ازمة الدستور دفعني لطرح اسئلة اكثر احاول فيها نقل وجهة نظر مباشرة عن الاحداث داخل الدستور وخصوصا ما حدث مع الفنان عمرو سليم والصحفي خالد البلشي

حازم .. ربما سيصبح هذا الاسم احد اهم الاسماء المؤثرة في مسيرة عمرو سليم كفنان كاريكاتير.. ازاي؟ لان حازم كان سببا معلنا لمنع رسمته في الدستور التي اهداها الينا حصريا وسماها رسمة حازم

عن فن الكاريكاتير وتأثيره ودور عمالقة الكاريكاتير فى الستينيات والسبعينيات وعن الاجيال الجديدة من رسامي الكاريكاتير .. عن المشهد السياسي بمصر وعن دور الصحف المستقلة تحدث الينا في حوار لا تنقصه الصراحة ... رسام الكاريكاتير .. عمرو سليم في حوار خاص

المحروسة:
في البداية بنرحب بالاستاذ عمرو سليم معانا في " ضيف وحوار " على مجموعة المحروسة البريدية

عمرو سليم:
انا اللي برحب بيكم وبسجل اعجابي بالمجموعة لان انا شايف انها في وقت قصير قدرت تضم ناس كتير جدا شايف الحاجة اللى تميزها واللي عجباني اوى ان فيها مختلف التيارات السياسية يعني فيها يسار وفيها اخوان .. حاجة جميلة جدا فعلاً وكل اللي بيجمع المجموعة زي ما انا شايف مصلحة الوطن العامة وده الامر اللي يهمنا كلنا

المحروسة:
في البداية نحب بدأ مع حضرتك بتواريخ مهمة فى حياتك .. حضرتك مواليد 62 ..خريج المعهد العالي للسينما قسم رسوم متحركة اخرجت فيلم مدته 9 دقائق "الدار" .. ليه لم تستمر في الرسوم المتحركة والكرتون؟

عمرو سليم:
انا مؤمن اولاً ان الفن رسالة ، لما اتخرجت كان المتاح للعمل فى الرسوم المتحركة مجرد انى اكون رسام دعاية واعلان ، انا محبيتش دي قوي حتى دلوقتي الرسوم المتحركة بينظر لها على انها فن اطفال او فن دعائي ، مفيش انتاج تقدر تقول عليه انتاج سينمائي لرسوم متحركة ، بالتالي انا لو النهاردة قلت مثلاً هعمل حاجة عن قضية لبنان عشان اعملها فيلم رسوم متحركة هتاخد سنة مثلا على ما تنزل او ست شهور ، الكاريكاتير اسرع لانه فن سريع .. بتقول رايك النهاردة وتشوفه بكره فى الجورنال فده رأيي وده كان سبب اتجاهي ان هي رسالة ولازم توصل بشكل سريع

المحروسة:
بالنسبة للكاريكاتير .. البداية كانت هواية ؟

عمرو سليم:
انا كل حاجة في حياتي جت بتوفيق ربنا فعلا ، هديك مثال : انا كنت اشتغلت فترة في الدعاية والاعلان بعد ما اتخرجت وبعدين حصل صِـدام مع ناس ، لكن فيه حاجة فاكرها كويس جدا سبب دخولي موضوع الكاريكاتير ده همه حادثتين : وانا فى سنة تانية فى المعهد كان فيه واحد صاحبي جه قاللي فيه ناس عايزين رسامين ، انا مكنتش رسم كاريكاتير قبل كده خالص ، روحت قابلت الناس وكان فيه كتاب بيعملوه اسمه ( دليل الشاب الذكي لاقتناص الوظائف المرموقة ) ومفروض اننا نعمل له رسومات مصاحبة .. احنا كلنا تلاته وكان اصحابي الاتين اللي معايه بيرسموا احسن مني ، عملنا الشغل وروحنا .. أول واحد دخل للراجل وفرجه الشغل وبعدين طلع متضايق وقالنا ان الراجل مخدش باله الان من رسمه واحده بس .. انا قلقت واتضايقت عشان صاحبي ، صاحبنا التاني دخل قبل برضه خد رسمتين بس من حوالي ستاشر رسمه وطلع متضايق برضه .. انا اتضايقت عشان صحابي وقلت لو قال كلمة عليه واحده هدخل اضرب الراجل ده ، أول ما دخلت فلاقيت الراجل قام وقاللي أهلاً بالرسام الكبير ، فانا الاول فكرته بيتريق لاني عارف اني برسم اقل منهم .. قاللي بالحضن ده انت عامل شغل هايل ، شكيت فى الامر وبعدين بصيت ورايا فاكره بيكلم حد ورايا ملاقيتش حد ، انا طبعا فاكره بيهزر وكان معاه دكتور تاني وعمالين يضحكوا على حاجات انا هُـيء لي انها حاجات متضحكش خالص ، بس دلوقتي اما افتكر الاقي فعلا انها كانت كاريكاتير وانا مش واخد بالي .. يعني مثلا من ضمن التوجيهات يقولك ( لا تدخل على المدير وانت في يدك سيجارة ) اقوم انا راسمه وهو داخل في ايده شيشة ..، فاعتبروا ان ده كاريكاتير وكتبوا معايا عقد ويومها كان اول مرة اخد فلوس من شغل الكاريكاتير . انا فاكر يومها كانوا 120 جنيه وقعدت ابص على ايدي ومستغرب ازاي اجيب فلوس من الرسم .. وحسيت انى ممكن احب الكاريكاتير

تاني حاجة حاولت اشتغل دعاية واعلان وحصل ان اثناء وجودي فى الجيش وبعد خروجي منه كنت بشتغل في شركة وفجأة كان مطلوب مني انى اصمم كارت عن واحد صاحب مصنع بلاط ، عايزني اعمل البلاطة على شكل وردة .. انا معرفش اتضايقت ليه من الموضوع ده واتخانقت يوميها مع الراجل وسيبت المكان وقررت مرجعش تاني خالص اشتغل فى الدعاية والاعلان ، حسيت ان الفلوس ممكن تساهم في تفكيري ، لدرجة اني فاكر ان والدتي في اليوم ده سمعتها وهي بتعيط فى الصالة ومتضايقة من الشغل اللي عمال ارميه ده ، وقررت مشتغلش خالص فى الدعاية والاعلان ، فكرت فى الهجرة بره مع واحد صديقي مسافر نيوزيلاندا وكان عندي عربية صغيرة فكرت ابيعها ... في الوقت ده كان والدي رئيس القسم السياسي في روزا اليوسف اسمه جمال سليم الله يرحمه وبدأت والدتي تلح عليه ...الواد هيضيع مننا واتصرف ، فبدأ ياخد شغلي ويوريه للناس فى روزا اليوسف وقابلت رئيس التحرير وقتها كان الاستاذ محمود التهامي وأُعجب بشغلي وبدأت اشتغل كرسام كاريكاتير من ساعتها في روزا اليوسف واتعينت سنة 88

المحروسة:
يعني موافقتش انك تكمل في مجال الدعاية والاعلان عشان ميكونش فيه حجر على تفكيرك

عمرو سليم:
بالظبط

المحروسة:
عادة الفنان ميحبش يكون مقيد

عمرو سليم:
كلمة انه ميكونش مقيد كلمة مطاطه شوية ، لكن في النهاية الفنان بيتضايق لو حصل أي حجر على فكره او أي تدخل ممكن يحصل ، سواء كان من رقابة او رئيس تحرير أو تدخل طباعي حتى فى خطأ ما او حاجة غير مقصودة

المحروسة:
لما اشتغلت في روزا اليوسف كان عندك افكار ثورية تتناقض مع خط روزا اليوسف العام

عمرو سليم:
مش من زمان ودلوقتي انا من ساعتها وانا عارف ان انا في خط تاني غير خط روزا اليوسف ، بس انا عايز اقول ان روزا اليوسف مدرسة كايكاتير .. بمعنى انها بتتيح لنا كرسامين كاريكاتير اننا نقول رأينا ، انا متذكرش في روزا اليوسف ان حد حظر على فكرة من افكاري ، بس انا برضه لازم اكون من النباهة شوية اني اعرف كل مكان بشتغل فيه السقف بتاعي ايه ، انا دايما السقف او الرادار بتاعي بطير تحته بشبر ، مثلا ايام الدستور مكنش فيه رادار .. كنت بكسر الرادار دايماً .. فى الاسبوع فيه رادار اقل شوية من الدستور .. روزا ابقى مش صريح لو قلت ملهاش سقف .. ليها سقف طبعا .. بس الاحتراف انك تعرف ازاى تقول اللى انت عايزه سواء هنا او هنا او هنا ومتتناقضش فى افكارك بس المهم تعرف ازاي تتحايل على الامور ، همه في روزا فاهمين سياسية اوي وعارفين همه بيتعاملوا ازاي مع الرسامين وعارفين ان الكاريكاتير بدون حرية ميبقاش كاريكاتير يبقى اى مسخ تاني ، انا واخد حريتي تماما فى روزا وعارف انهم متحملين الجرأة دي وشايف ان دي روح روزا اليوسف ، انا في المقابل ممكن اسألك انت شايف ان فيه تناقض في شغلي بين روزا والاسبوع والدستور !؟

المحروسة:
كان بيبقى فيه بعض التماهي في المواقف مع روزا اليوسف ، مثلا انت رسمت ايام انتخابات مجلس الشعب فى الصفحة الاولى لروزا اليوسف رسمه عبارة عن الحزب الوطني والاخوان وكتبت ما اسخم من سيدي الا ستي

عمرو سليم:
اه .. وانا عندي حق في كده برضه ، انا بهاجم الاتنين برضه فى الدستور .. انا شايف فى رأيي ان العملية مش اهلي وزمالك ، احنا ليه نقول يا الحكومة يا الاخوان !؟ رأيي ان مش عايز لا حكومة ولا اخوان .. انا شايف ان فيه بديل احنا مش عارفينه ، وشايف ان البديل ده لازم يظهر ومتضايق جدا من انهزام اليسار وشايف انه مبيلعبش دور مظبوط زي الاخوان وبحسد الاخوان على انهم قادرين ينزلوا الشارع وقادرين يعملوا حاجات جميلة جدا وقادرين يلاعبوا الحزب الوطني بدهاء ، وده كلام كله كتبته ورسمته فى الدستور

انا رأيي ان فيه بديل تاني احنا مش عارفين هو ايه ، البديل ده اكيد افضل من الاخوان والحكومة

المحروسة:
البديل ده مدعوم من جهات خارجية ؟

عمرو سليم:
لا طبعا .. ده ميبقاش بديل دي تبقى خيانه ، احنا مش عارفين البديل ، انت قبل ثورة يوليو بيوم كنت تعرف حد اسمه جمال عبد الناصر ؟ احنا ننتظر البديل ونشوف ايه اللي هيحصل ، لكن عن رأيي انا محترم جدا حركة الاخوان ولكن انا مش عارف يعني هل ممكن لو انا عارضت مثلا الاخوان وهمه حكموا هل هبقى كافر ولا مش كافر؟ انا دلوقتي هنا في مكاني بهاجم ورغم كده رزقي متقطعش من روزا وباخد راتبي ومحدش منغص عليه محدش بيقل لي سكك ... انا معرفش الاخوان لو جم ممكن يعملوا ايه .. معرفش هل ممكن مثلا اتكفر لمجرد اني ارسم حاجة عريانه فى كاريكاتير او اتفاجيء اني ضد تعاليم أُولي الأمر .. معرفش

المحروسة:
نعود الى نقطة حرية التفكير .. هل بتشوف ان الرسام لازم يرسم اللي بيعبر عن فكره ، ولا مثلا يبقى عندنا نموذج زي الاستاذ احمد رجب والفنان مصطفى حسين ؟

عمرو سليم:
لا.. العملية دي فيها كلام شوية .. انا مؤمن تماما انه لابد ان يمتلك الفكر و الايديولوجية الخاصه بيه ، ولازم منعملوش كانه مجرد رسام لازم يكون مفكر ، لازم تعرف الرسام ده يَـسار ولا يَمين .. اخوان ولا حكومة ..مع اللي حاصل في لبنان ولا ضده .. دي كلها حاجات يصعب تعرف موقف رسام الكاريكاتير الا اذا كان هو اللي راسم

انا اللي عاجبني جدا في حركة الكاريكاتير فى الستينيات ان كان ناظر المدرسة دي صلاح جاهين اللي اول ما جه اصبح رسام الكاريكاتير هو اللي مسئول عن فكرته ، كان قبلها رسام الكاريكاتير بيفكروا له الناس وهو مجرد بيرسم باستثناء رخا وعبد السميع اللي همه سبقوا صلاح جاهين ، ولكن بوجوده والكتيبه اللي جت بعده زي بهجت وحجازي ومحيي اللباد دول كلهم كانوا بيفكروا لنفسههم ودول كلهم روزا اليوسف بخلاف اخبار اليوم اللى دايما تلاقي فيه كتيبة بتفكر لرسامين الكاريكاتير باستثناء هاني شمس فى اخبار اليوم ده بيفكر لنفسه ، انا ضد ان حد يفكر لحد وشايف ان ده تراجع لدور الكاريكاتير وشايف ان ده تراجع كمان لماهية فنان الكاريكاتير لانه رأي فى الاول وفي الاخر

المحروسة:
لكن انت كنت بتعمل ده فى قلمين .. بتترجم اللى بلال فضل بيكتبه الى رسومات

عمرو سليم:
لا مكنش بيترجم لرسومات بالعكس ، بلال بيبقى جايب فقرات معينة بتوحي لي بافكار كنت حريص جدا انى اعملها كاريكاتير منفصل ، اكبر دليل على كده حاجة .. لو انت فصلت كاريكاتير قلمين عن الصفحة هتلاقي كل كاريكاتير قائم بذاته ، انا موقعتش فى الخطأ ده .. انا راسم كاريكاتير خاص بيه ، بالعكس كمان بلال بيكون بيتكلم فى خط وانا راسم فى خط موازي ليه .. يعني لو احنا مثلا فى اوركسترا وبلال بيقول ده بالكمانجه انا بقوله بالساكس او بالكونتربس ، لكن انا مترجمتش طبعا افكار بلال وعمري ما ترجمت افكار حد

المحروسة:
بما اننا ذكرنا الدستور .. خلينا نتكلم شوية عن ازمة الدستور ، انا عايز من حضرتك الكلام الواضح المباشر ، ايه اللي حصل وايه سبب الازمة اللي أدت انك تسيب الدستور .. حصريا لينا يعني فى المحروسة

عمرو سليم:
اكيد حصريا للمحروسة .. انا للاسف الشديد بدأت تجربة الدستور وانا حابب جدا ابراهيم عيسى حابب جدا الدستور حابب جدا وجود المعادل الموضوعي للصحف القومية وكنت شايف اننا ككتيبة ممكن نعمل حاجة جميلة جدا ، الدستور بدايته كانت رائعة ووردية ومفيش سقف باى نوع من الانواع ، ولكن انا مش عارف ايه فعلا اللى حصل لكن انا ممكن اقول الموقف اللي حصل معايا ومعرفش الموقف ده ممكن يترجم ازاي .. هل موقف مسبق قبل كده هل حصل حاجة مش فاهم انا تحديدا ايه اللى حصل ، لكن يبدو ان قوة النجاح عمل ربكه فى المكان ، بس انا كنت حاسس وكنت دايما اقول لزملائي فى قسم الكاريكاتير ان الخطر الحقيق على الدستور هيكون من جواها مش من بره ابدا ومعرفش انا ليه كنت بقول كده ، ولكن اول ما طلع عدد الدستور وشافوا فى روزا اليوسف اسمي على الترويسة كانوا متضايقين جدا وقالوا لي كان لازم تقولنا انك رايح الدستور كمساعد رئيس تحرير ولازم تفاضل بين روزا اليوسف والدستور ، تقدم على اجازة بدون مرتب مثلا ، قولتلهم انا سني دلوقتي بيجبرني انى اقدم حاجة لحركة الكاريكاتير فى مصر خاصة وان محدش بيعلم حد عشان كده قولتلهم انا نفسي اعمل فى الدستور اللى مقدرتش اعمله فى روزا ، نفسي اعلم ناس جداد وشايف ان فيه امانه لازم اعملها ، وبناءا عليه كونت ناس بعضهم كان بيرسم لاول مرة ودورت عليهم فعلا كاني بدور على ابره فى كوم اش ، كان كل همي من التجربة دي ان يبقى فيه احترام لرسام الكاريكاتير .. ان العاملين فى كل مكان يعرفوا اهمية الكاريكاتير ، انت لو تلاحظ الكاريكاتير انتعش فى الدستور والناس بدات تشوف كايكاتير جريء ومختلف ، لاول مرة كنت بتشوف الحاكم بيترسم وهو على قيد الحياة وبيتهاجم ، وده انا حرصت اعمله برضه عشان نثبت اننا فعلا عندنا كاريكاتير حر .. ده ان انجحت فى عمله وقدرنا ان احنا نكسر تابوه تقديس الحاكم

كان من الحاجات المهمة اوى فى الدستور ان انا حطيت قاعدة ان مفيش رسمة لرسام تتأجل من غير ما الرسام يعرف ، منتعبش الرسام في شغل ويلاقي شغله مش نازل .. الرسام لازم يُحترم رأيه ، انا متذكر موقف حصل .. كان فيه مقال لسعد الدين ابراهيم ونزلي المقال عشان اديه لرسام يرسمه ، فاديته اولا لهاني شمس ولما قرأه قال لي انا مش هرسم الموضوع ده .. قلتله دي حريتك ، وانا كنت حريص مع زمايلي فى قسم الكاريكاتير ان مفيش حاجة اسمها رئيس قسم ومرؤوسين .. لأ.. كلنا بنستفيد من بعض ، اديت المقال لمخلوف قال لي برضه مش هرسمه .. قلت له براحتك .. كان فيه عبد الله قال لي يا استاذ عمرو مش هرسمه .. فبقينا في ورطة .. قلت لعبد الله طب انت عايز تعمل ايه .. قال لي لو رسمته هرسمه بشكل مختلف ، قلت له ازاي ؟ قال لي هرسم ضد.. قولتله تمام وفعلا رسم ضد، وانا كان عاجبني الرسم ولما شوفته قلت له كويس جدا ... سعد الدين ابراهيم بيمدح فى امريكا ورسوم وكاريكاتير عبد الله بيهاجم امريكا وبيهاجم الكاتب نفسه وعجبتنى جدا الفكرة دي ... طلعت الرسومات وابراهيم عيسى شافها فقال لي ايه ده همه مبيقروش المواضيع تحت !؟ قلت له لا بيقراوا المواضيع .. قال لي اومال ايه!؟ قلت له انا قلت لعبد الله اعمل رايك وخلاص و ده رايه ، قال لي بس ده راي مختلف ، قلت له اه مختلف .. قال لي و ده وارد ان يبقى الرسم مختلف عن المقال!؟ قلت له لا مش وارد لكن محتمل وده اللي هو عمله .. فقال كلمة لحد جنبه : يا سلام على الليبرالية اهي دي الليبرالية ، معرفش قالها بتهريج ولا قالها بجد بسد ي فعلا فى رأيي ليبرالية

اذن كان فيه حاجات معينة اتعودنا عليها فى الدستور ..مفيش شغل يتشال ، مفيش حاجة تتأجل ، لازم يكون فيه احترام لعمل رسام الكاريكاتير ولجهده

انا جيت في يوم بعد ما اتنشرت قلمين لاقيت رسمتين ليه متشالين ، انا معرفش ايه السبب فسألت سكرتير التحرير ( محمد الدسوقي ) مين اللي شال الكاريكاتير فقالوا لي انت اتفقت مع الدكتور احمد محمود( المشرف الفني ) ان الرسمتين يتشالوا ، قلت لهم انا متفقتش ، ابراهيم منصور ( مدير التحرير ) كلمني وقال لي انت مش جاي ليه ؟ قلت له في رسمتين ليه اتشالوا من قلمين وانا عايز اعرف مين اللي شالهم ، المهم قال لي طب تعالى ونتكلم، رحت لاقيت ابراهيم عيسى ورحب بيه كويس ولاقيت جاي ورايا محمد الدسوقي وابراهيم منصور واحمد محمود ، واحد على يميني وواحد على شمالي ، انا بحكيلك بدقة جدا ، قلت لابراهيم ان رسمتين ليه اتشالوا والعدد نزل من غيرهم ، فقال لي ازاي اتشالوا ! انا معرفش ، فلاقيت دسوقي بيقول لي يا استاذ عمرو ما انت اتفقت مع محمد محمود انهم يتشالوا ، قلت له يا ابني انا متفقتش ، وقلت لابراهيم عيسى طيب انا اللي راسم وبقول لك متفقتش ، دسوقي قعد يكررها انت اتفقت .. فحرصت اني اقول لدسوقي ( يا ابني ) .. قلت له يا ابني لان فيه فرق سن حوالي عشرين سنه .. قلت له يا ابني يا انت بتكدب يا اما معرفش بتقول كده ليه ! ، ابراهيم عيسى اتدخل وقال لي طب دول مصلحتهم ايه يكدبوا!؟ ده مدير التحرير وده سكرتير التحرير .. فانا لاقيت العملية مهزلة وحاجة تضحك ، قلت لابراهيم عيسى طب سيبك من مدير التحرير وسكرتير التحرير ومن رئيس التحرير كمان .. انا بكلمك كأصدقاء وانت عارفني كويس ولازم تثق في كلامي ، انا بقول لك انا متفقتش ان الرسمتين دول يتشالوا .. انت دورك يا ابراهيم تعرف دول اتشالوا ليه ومين اللي شالهم ، وانا حسيت فى الموقف ده ان شغلي لمدة سنه وصورة رسام الكاريكاتير اتهزت وكأني رجعت للمربع صفر .. فكان لازم اتشدد في الموقف ده ، قال لي طب خلص قلمين وانا هحقق في الموضوع ده .. نزلت رسمت قلمين اللى مفروض تنزل العدد الجاي وطلعتها لابراهيم ولاقيت معاه دكتور احمد محمود

المحروسة:
مقاطعا : همه ايه الرسمتين اللي اتشالوا ؟

عمرو سليم:
اول رسمة كانت بتخبط فى كامب ديفيد وكانت عن مبارك وأولمرت ، والرسمة التانية وهي الأهم - لان هيجي كلام بعدها - هيه رسمه كنت رسمتها كتير قبل كده واجرأ من كده شوية ، كنت راسم واحد بيتبول في الشارع وواحد امن مركزي جنبه بيقول له ممنوع الا بموافقة الامن ! بس همه دول الرسمتين انت شايف فيهم حاجة؟ انا رسمت اكتر من كده بكتير ..، دخلت لابراهيم بالرسم وسالته الاول حققت فى الموضوع ؟ قال لي اه ، قلت له طيب ادي رسومات قلمين شوفهم ، وابراهيم اساسا مكنش بيشوف قلمين الا بعد النشر ، فقال لي لا انا مبشوفش الا مع القراء ، قلت له طب شوف كده الرسمه دي .. انا كنت عامل رسمه قاصد ان يتبص عليها ، كان فقرة عاملها بلال فضل بيقول فيها ان هينري من ساعة ما طلع فى الاعلان مع هيفاء وهبي مبقاش عارف يشوط الكورة ، فانا رسمت جون طاير على حاجة اشبه بالكورة ، فوريتها لابراهيم فابتسم ووراها للدكتور احمد محمود ولاقيته – د / احمد – وشه اغمق ، فقلت له يا دكتور الرسمه معجبتكش مش كده !؟ قال لي اه معجبتنيش يا عمرو ، ولو انت اصريت انك ترسم بالطريقة دي انا مش هوضبلك صفحة قلمين دي تاني ابدا ، ومعنى اني مش هوضبها ان محدش هيوضبها ابدا فى المكان .. يبقى تجيبها بقى جاهزة من بره ... انا اتفاجئت بالكلام ده فقلت له يبقى انت اللي شيلت الرسمتين ، قال لي اه انا اللي شيلت الرسمتين ، اول رسمه شيلتها لاني اتفقت مع بلال اني اشيلها ولانها تتاخد صورة افضل ، قلت له لأ .. مفيش اتفقاق مع بلال حصل وانت مقلتش لبلال ومهما حصل كان لازم ترجع لي .. انا اللي راسم مش بلال هو اللي راسم .. ، قاللي تاني رسمه- ممنوع الا بموافقة الامن- شيلتها لان مينفعش ابني حازم يقول لي ايه ده يا بابا وانا معرفش اقول له ده ايه

انا لاقيتها حاجة غريبة اوي فقلت له ااه يعني انت عايزني ارسم على مزاج سيادتك !؟ وبعدين قال لي انا مش صغير في المكان انا كبير يا عمرو ، قلت له انا كمان كبير يا احمد .. ابراهيم بكل هدوء قال لي بص يا عمرو ... ده اخر اسبوع تنزل فيه قلمين ، قلمين من الاسبوع الجاي ملغية

المحروسة:
قلمين عمرو سليم وبلال فضل ولا عمرو سليم بس؟

عمرو سليم:
ااه عمرو سليم وبلال فضل ، قلت له وليه من الاسبوع الجاي يا ابراهيم ما تخليه من الاسبوع ده ، وقمت مقطع الشغل بتاع قلمين اللي كان هينزل وقلت له ولا هكتب المقال ولا شغال في الجورنال ده تاني ، ونزلت لميت حاجاتي واجتمعت مع القسم وقلت لهم على اللى حصل بالظبط عشان بعد ما امشي هيتقال روايات تانية مختلفة كتير جدا ، ولميت حاجاتي ومشيت ومحدش اتصل بيه ابدا حتى هذه اللحظة

المحروسة :
كان ايه موقف بلال فضل من الموضوع ده كله ؟

عمرو سليم :
بلال كان مسافر تركيا وبعت له على الموبايل انى سيبت الدستور ، ووقتها كان فيه مشروع اننا نجمع قلمين في كتاب وقولت له وانا هوقف الكتاب ده كمان .. ولما تيجي نتكلم ، بعد كده لاقيت بلال كاتب نداء ليه اني ارجع ، بعت له رسالة وقلت له على الاقل لما ترجع مصر تتصل بيه وتفهمني ، بلال قال لي انا مرجعتش ده ابراهيم عيسى قال لي اني اتحايل عليك انك ترجع ، وبعدين لاقيت فجأة كلام بلال ناشره بيقول فيه ان انا مشيت لاني اعترضت ان رسمه ليه اتأجلت ، وده كلام مفيهوش شيء من الصحة خالص.. انا مشيت عشان اعترضت على موقف ومبدأ ولاني حسيت اننا هنرجع تاني للمربع صفر ، انا كنت مستعد اقبل اى اعتذار حتى لو هيضحكوا عليه ويقولوا لي الرسومات طارت من على الكمبيوتر او عصام اسماعيل فهمي خاف فشيلناهم ، كنت مستعد اقبل اى كدبه وهعرف انها كدبه وخلاص .. يبقى همه عملوا كده وغلطوا ومكسوفين يقولوا وخلاص ، لاني شايف انه من الاحتراف اني ممشيش من مكان عشان رسمة اتأجلت

لما لاقيت بلال كاتب كده قلت له عيب انك تكتب من غير ما تفهم ، همه يظهر فهموك حاجة غلط .. لو انت عايز تفهم اتصل بيه وقولي ايه اللي حصل وانا اقوللك ، بلال اتصل بيه وقاللي ازيك انا لسه راجع من لبنان ، ومحمد دسوقي ( سكرتير التحرير ) قاللي انك مشيت عشان رسمه ليك اتأجلت ، قلت له الكلام ده كدب وحكيت له على الموضوع ، بلال قاللي ازاي ده حصل وجدع انك عملت كده وانا لو مكانك كنت عملت كده وانا لو كده اسيب قلمين انا كمان ، قلت له لا انا مش طالب منك تسيب لان الموقف ده خاص بيه انا ، قاللي طب احنا نقعد مع ابراهيم ونتكلم ، قلت له زي ما انت عايز

من حوالي اسبوع بلال كلمني وقاللي ابراهيم في مزنق لان احمد محمود هو اللي بيوضب الجورنال كله وهو في مأزق .. وهو اعتمد على رحابة صدري والأمر للزمن انه يدوب الحاجات دي .. جايز في يوم اقابله اسلم عليه وابوسه هو يقابلني يسلم عليه والامور تفوت ... كلام عبيط وخلاص

انا مشيت لانى اكشتفت بعد سنه ان الدور اللى كنت رايح اعمله لرسام الكاريكاتير رجع للمربع صفر ، ولو كنت انا قبلت كانت كل الرسومات بعد كده هتتراقب بحجة ان " حـازم " يزعل ، وكل رسامين الدستور شغلهم هيتراقب بحجة ان " يزعل "

المحروسة:
تقييمك لموقف ابراهيم عيسى وبلال فضل .. موقف مين اثر فيك اكتر ؟

عمرو سليم:
ابراهيم انا اتصدمت طبعا باللي هو عمله والعملية شبهتلي بالظبط بحاجتين : كما لو كان واحد رايح رحلة وبيعلي صوته يطلب زيادة مصروف فابوه قال له مش هتطلع الرحلة خالص ... الموقف التاني : كان فيه مطعم هنا روحت كلت فيه وصاحب العمل بيطلب منه ينفذ اللي بيقوله وقال له : يا تسمع الكلام ياض يا تمشي .. فانا افتكرت الموقف ده يوم اللي حصل فى الدستور ، لاني حسيت ان اتنين ارباب عمل بمجرد انى حبيت اعرف استفسار للي حصل لاقتني بتعاقب وكأنها منحة انى ارسم قلمين ، ويتقال لي قلمين هتتلغي من العدد الجاي.. انا عمري ما مريت بموقف زي ده ابدا

انا تفكيري ان ابراهيم عيسى صديق شخصي جدا لاحمد محمود وبيحبه جدا ويبدو انه حس ان صديقه ده في مأزق او اتزنق في الكلام .. او يمكن بيحب حازم شوية هو كمان

بالمناسبة .. انا فكرت اطلع الكاريكاتيرة اللي اترفضت على النت واسميها حازم ، وهيبقى اسم جميل .. عمر الموقف ده ما حصلي في اي مكان ابدا

* حصريا للمحروسة *

المحروسة:
ولا في روزا اليوسف ؟

عمرو سليم:
نهائي.. أنا هقوللك مثلا موقف حصل في روزاليوسف ، عملت الكاريكاتيرة بتاعة الصفحة الأولي و رحت مشوار في وسط البلد لقيت تليفون من عبد الله كمال: انت فين ؟ أنا في وسط البلد.. قاللي الرسمة دي أنا قلقان منها، أنا أرحب جدا بالصراحة ... قال لي ينفع تعملنا واحدة غيرها قلت له ينفع أعمل واحدة غيرها قال لي قصادك أد ايه؟ نص ساعة قال لي هنستناك مش عايزين نطلع من غيرك..الموقف دا عندي بالدنيا

جيت فعلا و عملت رسمة تانية ونزلت ، أنا مع الصراحة..انت تقول لي أنا خايف من الرسمة دي أوكي..الأسبوع ساعات يكلموني يقولوا لي احنا خايفين من دي بعمل واحدة غيرها .. دي تعرض لتحقيق ،لكن ماينفعش تقول لي احنا مالناش سقف وبعين يطلع السقف في الاخر هو ابن المشرف الفني

المحروسة:
تقييمك لموقف بلال فضل

عمرو سليم:
أنا شايف ان بلال صداقته مع ابراهيم بحترمها جدا و شايف فعلا ان مافيش حاجة تستدعي انه ياخد موقف أوي ، أنا طبعا موجود في روزا من قبل ما بلال ييجي روزا و بلال صديق من أيام ماكان في روزا و احنا اصحاب أنا انبسطت جدا بقلمين اللي أنا كنت برسمها معاه و بعدها من أحسن الحاجات اللي أنا عملتها في حياتي من العلامات الكويسة اللي أنا عملتها لأني كنت بحاول فيها اكسر التابوهات ، و انا نفسي بحب شغل بلال.. و بلال أنا بعذره طبعا في كل شئ و أنا مش مع ان حد يسيب الدستور كتير اليومين.. في النهاية احنا ممكن نقول حاجات كتير أوي علي اللي بيحصل داخل الدستور..لكن اللي عنده 16 و 17 سنة و طالع ومبيصدقش الجرايد القومية وفجأة يشوف جورنال حلو زي الدستور طالع زي الوردة كدة ييجي يشمه يطلع وردة بلاستيك
هيكفر بكل شئ ، أنا شايف ان الدستور تجربة عادية و لازم تحصل، لازم يبقى فيه صحف قومية و صحف حزبية ميتة و صحف مستقلة صوتها عالي أوي و بعدين هنصدقها و بعدين منصدقهاش بعد كدة ، لحد مايطلع صحف محترمة ...يعني احنا لسة بنقول ألف باء ديموقراطية لسة بنعافر و نزق سقفنا بايدينا و أحيانا السقف ينزل علي دماغنا و أحيانا بنقدر ان احنا نزقه...الدستور جورنال كويس...اتخمينا فيه ماشي هيطلع جورنال بعده أحسن ..الدستور يعني مش رسالة الاهية

المحروسة:
موقف حضرتك داخل الدستور تزامن مع مواقف و صدمات أخري داخل الدستور،انت كنت شايف الوضع دا قبل موضوع الكاريكاتيرات ، بالتحديد الاوضاع المالية المهدرة للعاملين و الصحفيين الغير متعاقد معاهم؟

عمرو سليم:
لا دا ماكنتش شايفه لسبب ..أنا قبل مامشي من الدستور في كذا حاجة ضايقتني علي خفيف..زي مثلا انهم حبوا يعاملوا رسامين الكاريكاتير كموظفين عندهم فعملوا جدول الرسام ده يجي بمعاد ويمشي في الوقت دا ،بس أنا رفضت و قطعت الجدول ..رسام الكاريكاتير مش موظف .. ماينفعش مخلوف ييجي يقول لي أنا تعبان عايز أروح أقول له لا أقعد ارسم.. لا يمكن ..رسام الكاريكاتير زي لعيب الكورة مقدرش أبو تريكة مثلا يقول لي أنا رجلي مكسورة أقول له لا هتلعب الماتش ..لا يمكن مش هيلعب حتي لو أجبرته ينزل هينزل بيعرج مش هيلمس الكورة مش هيجيب اجوان ،رسام الكاريكاتير قال لك انا تعبان يبقي تعبان عايز أمشي يمشي ، واحد جه معاد مع بنوته خطيبته عايز يقابلها و أنا أقعده يرسم كاريكاتير هيشتمني لازم يروح يقابلها طبعا و هيرجع يرسم أحسن.. يعني يتعبوا رسام عايزينه يخلص صفحة دلوقتي فييجي الرسام يقول لي أنا تعبان أقول له امشي فورا ،اجري قبل ماحد يشوفك يقول لي طب لو كلموك !؟ أقول له ملكش دعوة يكلموني مين مشاه ؟..أنا مشيته.. ليه؟ تعبان..هييجي بكرة يرسم

في بعض الحاجات خليتني في الوقت الأخير أقفل أكتر علي القسم بتاعي و دا خلاهم بعد كدة يتهموني ان أنا عامل حائط زجاجي و مابخليهومش يقتربوا من الرسامين ، أنا كنت بقول لابراهيم انزل ربع ساعة بس مع الرسامين يوم يواحد في الاسبوع ،مكنش بيعمل كدة ..معرفش دلوقتي بدأ يعمل كدة و لا لأ لأن أنا حسيت برضو ان بدأ يبقي فيه عزلة نتيجة كدة أنا قفلت أوي علي قسم الكاريكاتير بس كنت بسمع من بره ان فيه أجور ضعيفة و متدنية لكن المواضيع كلها بتاعة خالد البلشي دي أنا سمعتها قبل مامشي بأسبوع بالظبط لأن خالد مشي قبلي بأسبوع ، دي زودت ضيقي من المكان بس ماكنتش توصل بيه ان انا أمشي لأن أنا كنت حريص أوي علي ان التجربة تستمر لأن زي ما قلت لك صعب أوي نكسر شباب عندهم 16/ 17 سنة ، لأن كان في ناس بيبعتولي عندهم 14 سنة وبيقروا سياسة و بيقولولي احنا أول مرة نقرا سياسة كانت في الدستور..
دا كان مهم أوي انه يفضل فا هما ما أرادوش ان النجربة تستمر

المحروسة:
حضرتك قرأت رواية الأستاذ خالد البلشي و الرواية المقابلة ليها و الكلام اللي تناقل علي مدونة مصرنا و أصبح موضوع الدستور موضوع شتايم و شتايم مضادة و اتهامات و اتهامات مضادة ،
انت تقييمك ايه لكلام خالد البلشي و الصحفيين اللي معاه و الكلام المقابل لابراهيم عيسي؟

عمرو سليم:
خالد البالشي مبدئيا شخص أنا بحترمه جدا و بقدره و محب لشغله،وانا تزاملت مع خالد كتير قبل ما خالد ييجي روزا بالمناسبة أنا كنت الواسطة بينه و بين روزا ، انا اللي اتصلت بيه ... عبد الله كمال كلفني بده .. قال لي في ولد كويس أوي في مجلة اليسار كانت بتصدر و كانت مطبوعة هايلة برئاسة الأستاذ حسين عبد الرازق كان خالد هو مدير التحرير هناك فقال لي في واحد اسمهخالد البلشي ....تعرفه؟ قلت له يعني( أتكلم معاه و أجيبه.. و جه فعلا ،خالد صحفي كويس أوي أوي.. بيدافع أوي عن قضاياه.. مؤمن بيها جدا...محترم .. أنا اصدق كل كلمة قالها خالد طبعا مؤكد

المحروسة:
متصدقش أي رواية مقابلة!؟

عمرو سليم:
لا طبعا خالد أنا مصدقه تماما لأن دا فعلا اللي حاصل ، الرواتب المتدنية دا فعلا صح بس دا مش حال الدستور بس دا حال كل الصحف بس خالد اللي ضايقه مش الرواتب المتدنية أد الموقف نفسه اللي حصل ، الموقف اللي أنا قريته علي النت ده أنا محضرتوش .. ان زي ما الدستور عملتكم هتعمل غيركم و جايبكم من علي الرصيف.. دا كلام!!؟

المحروسة:
الكلام دا ابراهيم عيسي قاله فعلا؟

عمرو سليم:
أنا مسمعتوش فعلا لكن أنا قريته علي النت و خالد أنا أصدقه طبعا

المحروسة:
سمعت من خالد البلشي؟

عمرو سليم:
اه سمعت من خالد طبعا و قريت

المحروسة:
طالما سمعته من خالد البلشي وبتصدقه يبقى ابراهيم عيسى قال الكلام ده

عمرو سليم:
ماهو ابراهيم قال بس أنا مسمعتش ،كلام الناس كلها يقول ان ابراهيم قال و بعدين ابراهيم مكدبش الكلام ده

المحروسة:
حضرتك بتشوف بعد تجربة الدستور ان حالة الاستبداد اللي بنعاني منها هي حالة استبداد عامة و ليست خاصة بمن يحكمنا فقط؟

عمرو سليم:
لا و الله مش استبداد عامة لا..ما هو في جرايد ماشية زي الفل يعني ، هو بس في شخص بيحتمل النجاح و شخص ميحتملش النجاح .. زي مثلا انت تجيب تليفزيون فيه مثلا تلات قنوات و انت عايزة تعمله دش فيه ألفين قناه فهيفرقع منك .. يبدو ان ابراهيم متحملش نجاح الدستور

المحروسة:
من بدايات الدستور و اسم عمروسليم علي ترويسة الدستور ثم الموقف اللي حضرتك ذكرته وانتهاءا بانك تقطع الرسومات و تمشي و تسيب الدستور,,تقييمك لسياسة ابراهيم عيسي في الدستور من أول ما نزل اسمك لغاية ما سابك تمشي دون ان يتوجه لك بالاعتذار

عمرو سليم:
أنا بداية عايز أذكر حاجة.. أنامطلبتش ان اسمي يبقي علي الترويسة بتاعة مساعد رئيس التحرير ، أنا كنت سلمت الشغل و كنت حريص في أول الشغل اني أعمل شغل جرئ عشان زي ما بقوللك أنا كنت حريص أوي نكسر التابوهات .. ان الحاكم مايتهاجمش وهو علي قيد الحياه.. لازم نهاجم و دا دور الدستور ماينفعش عايز أهاجم مبارك فيقول لا و النبي هاجم أحمد نظيف و الناس هتفهم مبارك لا دا يبقي ميوعة ،فانا كنت راسم حاجة قوية في أول عدد فلقيت مكالمة من ابراهيم... قال لي يا عمرو ازيك أنا خدت قرار و عايزك تساعدني فيه .. ، قلت له الرسمة هتشيلها .. قال لي لأ أنا هحط اسمك مساعد رئيس التحرير و أرجوك تساعدني في كدة ...قلت له دى حاجة تشرفني يابراهيم دا شرف ليه أنا متشكر جدا ، و ابراهيم قال لي أنا حريص علي كدة لسببين أول سبب ان دا حقك تاني حاجة ان أنا عايز أثبت للناس ان رسام الكاريكاتير يستطيع يكون رئيس التحرير في يوم من الأيام و دي احترمتها جدا في ابراهيم و كل حاجة كنت كويسة جدا يعني أنا عايز أقول برضو ان ابراهيم كان هو الواسطة اني أظل في روزا و في الدستور في نفس الوقت نتيجة صداقته اللي قال لي عليها بمحمد عبد المنعم رئيس تحرير روزاليوسف السابق اني أظل في الدستور وميحصلش مفاضلة بين هنا و هنا،كل حاجة كنت كويسة جدا ل..معرفش ايه اللي حصل في اخر شهرين أجواء غريبة جدا حصلت في الدستور معرفش ايه سببها حصل ضغط عليه بشكل معين

المحروسة:
ممكن يكون سببها مشكلة بنت رئيس مجلس الادارة اللي حصلت في نقابة الصحفيين عشان تعيينها و العقود بتاعة الصحفيين اللي بيشتغلوا متطوعين في الدستور ؟

عمرو سليم:
و الله أنا زي مابقوللك كل حاجة كانت كويسة جدا لحد اخر شهرين معرفش ايه اللي حصل فعلا ، و بالمناسبة موضوع بنت رئيس مجلس الادارة دا مكنتش أعرفه خالص ..أنا عرفته من الصحف قريت عنه في روزا اليوسف و العربي ،أنا فجأة لاقيت جمال فهمي بيكتب معانا ، و فجأة لاقيته مبيكتبش ...ماعرفش ايه السبب في كده .. في حاجات ماكنتش أعرفها خالص ..في حاجة في شهرين حصلت ماعرفش ايه اللي حصل !؟ مش عارف هل اللي حصل بس معايا أنا و ابراهبم من جهة معينة ..مش عارف ! بس أنا أما أقعد أفكر في اللي حصل معايا تحديدا و مع خالد أحس ان هل مثلا كان مرتب ان احنا نمشي؟ مش فاهم

المحروسة :
ننتقل للأسبوع رسومات عمرو سليم في الأسبوع تكاد تكون متحفظة تماما ، لاحظ الفرق بين الدستور و الاسبوع ...الاتنين فيهم لهجة حادة لكن الاسبوع ليها خط أحمر هو خط الرئيس.. يعني لا يستطيع عمرو سليم انه يتجاوز خط الرئيس

عمرو سليم:
لأ.. عمرو سليم يستطيع .. بس رئيس التحرير ميستطيعش ينزل حاجة ضد الرئيس ،و أنا مش عايز أحرج الأستاذ مصطفي بكري في الموضوع دا يعني أنا ما قدرش أقول له انت ما بتخلنيش ليه أهاجم مبارك ... هو شئ طبيعي .. راجل عايز يحافظ علي جورناله

المحروسة:
طب ليه ما سألتوش هو ليه مش عايز يهاجم مبارك؟

عمرو سليم:
أقول له كدة !!؟؟؟ لا هقول لك حاجة .. احنا نعترف و لازم نكون اذكياء ونقول ان كل صحيفة ليها سقف زي ما كل صحيفة ليها روح... أنا في الدستور مكنش مجرد مكان بشتغل فيه ،يعني في الاسبوع الأستاذ مصطفي بكري أخويا الكبير و صديق و وقف معايا وقفات شهمة جدا .. وقف معايا في وفاة والدي ورجل شهم لو عوزته في أي حاجة هتلاقيه واقف جنبك فعلا ..واشتغلت معاه قبل الاسبوع في مصر الفتاه و الأحرار وكل مكان يمشي منه كنا نمشي كلنا معاه، لكن مصطفي بكري الصدام اللي حصل في الدستور دا محصلش معاه أبدا ..بس فيه حاجة .. لازم أعرف تماما دايما محظوري الأول في الاسبوع، الأسبوع متاح لي أهاجم أي حد بس كسائر الصحف القومية و الحزبية انت قبل الدستور شفت حد بيرسم مبارك؟

المحروسة:
الاسبوع لا قومية و لا حزبية؟

عمرو سليم:
الاسبوع مستقلة

المحروسة:
طيب ما هي الدستور مستقلة

عمرو سليم:
لا... تفرق

المحروسة:
المصري اليوم مستقلة

عمرو سليم:
المصري اليوم بتهاجم مبارك؟

المحروسة :
ايوه

عمرو سليم:
لا .. أنا بتكلم عن الكاريكاتير ،الكاريكاتير لأ ، شوف أنا مشيت مثلا من الدستور مبقاش أي حد برضو يهاجم مبارك .. فمنلومش مصطفي بكري ..أي واحد فينا له حساباته ، الدستور هل تلمح فيها أي هجوم عن أمريكا؟ عمرك قريت حاجة لهجوم علي أمريكا

المحروسة:
اه طبعا قريت هجوم علي أمريكا

عمرو سليم:
في الدستور

المحروسة:
اه

عمرو سليم:
طلعهالي طلعلي العدد الأخير

المحروسة:
في كتابات بتهاجم أمريكا

عمرو سليم:
أنا أتمني أشوف الدستور بيهاجم أمريكا و أتمني أشوف الدستور بيهاجم الاخوان كمان ،شفته بيهاجم الاخوان؟

المحروسة:
تقصد ايه بالكلام ده؟

عمرو سليم:
أنا مقصدش حاجة أنا قصدي أقول لك ان كل مطبوعة و ليها توازناتها اللي حتي العاملين فيها ما يعرفوهاش

المحروسة:
طب ما ابراهيم عيسي بيهاجم أمريكا

عمرو سليم:
لا ابراهيم ما يهاجمش أمريكا ... ابراهيم بيحب أمريكا

المحروسة:
ابراهيم عيسي بيحب أمريكا؟

عمرو سليم:
اه طبعا أنا حكيلك موقف برضو حصريا للمحروسة .. مكنتش عايز أحكيه أبدا .. في يوم لاقيت شريف عرفة رسام الكاريكاتير اتصل بيه قال لي يا أستاذ عمرو في صحفي أمريكي عايز يعد معاك يتكلم عن أحوال المعارضة في مصر و الصحافة و انتم ليه بتهاجموا أمريكا و انتم بتحبوا أمريكا و لا لأ... أنا حسيت من الكلام ان الصحفي دا مش صحفي وأنا عارف ان الصحافة في أمريكا قريبة قوي من المخابرات و عارف ان ممكن صحفيين كتير يتنطورا في العالم و يرجعوا بتقارير للحكومة الأمريكية فيعرفوا بالضبط اتجاه الرأي العام و الصحافة في مصر ايه ، فقولتله أنا مش هقابله قال لي ليه ؟ قلت له أنا ماعنديش وقت أولا أقابله و مش عايز أقايله و مش طايق أقابله ،فقال لي طب أنا جاي الدستور و في معاد مع الأستاذ ابراهيم عيسي و هيقابله ، قلت له يقابله ، و اليوم مشي عادي في الدستور و طلعت بشوف الملازم عاملة ازاي و البروفات ماشية ازاي و الرسومات و فجأة لقيت شريف عرفة طالع و معاه الصحفي الأمريكي و عرفني عليه و قال لي متتصورش ...حاجة هايلة.. قلت له حاجة هايلة ايه يا بني !؟ قال دا الأستاذ ابراهيم طلع بيحب أمريكا جداً .. قلت له يا سلام ! ازاي بقي !؟ قال لي دا قال كلام أنا مكنتش متخيل انه هيقوله أبدا ،قال لي دا كان ناقص يقول قصائد شعر في أمريكا ،قلت له يستحيل طبعا ! قال لي و الله العظيم ... قاللي أنا أول مرة في حياتي من ساعة ما الصحفي دا نزل مصر أشوفه مبسوط بالشكل دا لدرجة انه اتصور معاه و حضنه ، قال لي هتتكلم معاه ؟قلت له اه أنا هتكلم مع الصحفي دا ، و قطعت له أمريكا .. تلات ساعات من التقطيع في أمريكا لدرجة انه اتضايق جدا ، وكان شريف بيترجم وكل شوية يقول لي أنا أول مرة أشوفة متضايق بالشكل دا ، الصحفي كان وشه بيحمر و فجأة يدخل يدافع عن أمريكا و فجأة يعتذز و يقول أنا أسف المفروض ما أتدخلش أنا دوري ان أنا أكتب كلامك و بس ، بهدلته .. حسيت انه لازم يحصل في توازن ، دي واقعة ممكن تسأل فيها شريف عرفة

المحروسة:
ليه حضرتك بتقول ان الدستور مابتهاجمش الاخوان

عمرو سليم:
لأن أنا حاسس ان في اقتناع أوي بالاخوان أزيد من اللازم

المحروسة:
مش ممكن يكون عشان بعد ما حصلت مشكلة آفاق عربية فالدستور تجاريا بتوظف ده تجاريا بزيادة التوزيع؟

عمرو سليم:
انت عايز تقول ان الاخوان قوة شرائية و بيشتروا 25 ألف نسخة في الأسبوع؟

المحروسة:
ايوه

عمرو سليم:
بص أقول لك حاجة مؤكد ان فيه مغازلة لتيار الاخوان ، مؤكد ان ابراهيم حابب الاخوان و مقتنع بمهدي عاكف ، أنا من الحاجات اللي سمعتها ان مهدي عاكف لما جالنا الدستور خالد هاجمه بحاجة أو مسك عليه كلمة فابراهيم دافع عن مهدي عاكف .. وحتي خالد حكالي الموقف دا

المحروسة:
خالد رمضان و لا خالد البلشي

عمرو سليم:
لا خالد البلشي ، أنا معرفش خالد رمضان أنا بشوف كتاباته بس ،انا شايف طبعا ان ابراهيم مقتنع بالاخوان و شايفهم بديل مظبوط و انا مش شايفهم بديل ،أنا لما جيت الدستور مارحتهاش على انها صحيفة اخوان ،أنا رايحها علي انها صحيفة مستقلة.

المحروسة:
ابراهيم عيسي بيحب متناقضين؟

عمرو سليم:
و مين قال ان الاخوان نقيض أمريكا؟ انت شايفهم متناقضين؟؟ ( ضحك )

المحروسة:
مش عارف (ضحك)

عمرو سليم:
لا طبعا مافيش تناقض بينهم ..ازاي!؟

المحروسة:
طب ايه العلاقة بين الاخوان و أمريكا؟

عمرو سليم:
و ايه الاختلاف؟ انت ممكن تعمل هنا في مصر الاسلام التركي

المحروسة:
طيب خلينا نفرق عشان أمريكا كلمة عامة و مطاطه ،خلينا نرجع لكلامك عن ابراهيم عيسي وحبه لأمريكا ، ابراهيم عيسي بيحب أمريكا الحكومة الأمريكية ؟النظام الأمريكي؟

عمرو سليم:
لا ..النموذج الأميريكي.. الديموقراطية الأمريكية.,,أنا شايف عن نفسي ان الديكتاتورية أفضل ألف مرة عن الديموقراطية الأمريكية للأسف ، الاتنين بلاوي سوده بس احنا أي حاجة ممكن نعالجها هنا في مصر لكن بدون تدخل أجنبي خالص

المحروسة:
الديكتاتورية زي الديكتاتورية الناصرية طبعا

عمرو سليم:
لا طبعا (قهقهة) أقول لك حاجة ما هو أيوة عبد الناصر كان فيه ديكتاتورية زي ما السادات كان ليه ديكتاتورية زي ما مبارك ليه ديكتاتورية بس أنا شايف ان الشعب مغيرش بالتالي هو المسئول عن الكوارث اللي بتحصل ، الكوارث اللي احنا كلنا فيها .. لكن عبد الناصر لو عمل الديكتاتورية ما عبد الناصر هو اللي عمل السد العالي و مجانية التعليم و الاصلاح الزراعي و اللي أعاد بناء الجيش

المحروسة:
و هو اللي عمل المعتقلات

عمرو سليم:
أيوة و المعتقلات استكملها السادات و استكملها مبارك، بس أنا برضو عايز أقول حاجة بمناسبة اننا قلنا مبارك ،أنا ناصري ..لو هجومي علي مبارك واني ارسم افاه .. لو أنا كنت عملته أيام عبد الناصر كان زماني اتشنقت تاني يوم ، أنا عايز أقول لك اني لحد ما مشيت من الدستور مجاليش رسالة تهديد واحدة مافيش تليفون واحد جالي أرتاب فيه مافيش كلام من دا حصل

المحروسة:
كان في كلام بيقال ان أعضاء من الحزب الوطني و بالتحديد من لجنة السياسات كان ليهم تهديد او تلميح يطالب الدستور بالتخفيف من حدتها

عمرو سليم:
يبقي ممكن يكون دا السبب اللي عشانه تمت الاطاحة بيا و بخالد، يبقي انت ممكن تكون فسرت حاجة أنا كنت بفكر فيها.

المحروسة:
يعني المشكلة كان سببها هو قفا الرئيس؟

عمرو سليم:
مش قفاه تحديدا هو ممكن يكون الرسم (ضحك) ، هو قفاه مش عاجبك ؟ بس كلامك دا ممكن يكون فيه شئ من الصح لأن أنا فعلا بمجرد مامشيت ما ترسمش فعلا مبارك تاني أبدا في كاريكاتير أنا كنت معتقد للأسف الشديد ان حصلت طفرة في الكاريكاتير و ان انكسر أول تابوه كان باعد الناس كلها ،يهمني أوي أوي ان في يوم من الايام الاجيال اللي بعدنا هتقول ان احنا الناس دول عرفوا يهاجموا حاكم و هو علي قيد الحياة دي عمرها ما حصلت في مصر ،يعني أنا ماشفتش لعبد الناصرأبدا كاريكاتورضده و هو علي قيد الحياة بعده اه يتشتم ، السادات شفتله كاريكاتير اتهاجم وهو علي قيد الحياة من صلاح الليثي في كاريكاتيرة واحدة في مجلة ثورة 23 يوليو اللي كان طلعها محمود نور الدين زعيم تنظيم ثورة مصر في انجلترا و دا كان في انجلترا و الكاريكاتير اللى كان بيعمله نبيل الله يرحمه أما كان في الكويت و كان بيمضي (نون) مابيمضيش باسمه، أنا كنت معتقد ان دا أول حاجة حد يعملها و ان في ناس بعدي هيعملوه و هيبقي عادي بعد كدة انك تهاجم مبارك و هو عايش زي سائر الكاريكاتيرات ضد شيراك وهو عايش و ضد بوش و ضد توني بلير ، فبعد ما مشيت انسحبت

المساحة اللي كنت معتقد ان الكاريكاتير كسبها رجع كله كما كان و حتي زمايلي في الدستور محدش بقي يجرؤ يرسم حتي قفا مبارك.

المحروسة:
هل شايف ان حرية رسم مبارك قفاه أو شكله أو الأشكال المختلفة اللي كنت بترسمها في الدستور,, دا نوع من أنواع عدم الاهتمام بدور الكاريكاتير أو ان الكاريكاتير مجرد ديكور أو مجرد رسم الناس بتضحك عليه و صورة مُجَملة لهامش الحرية اللي بنعيش فيه؟

عمرو سليم:
شئنا أم لم نشأ احنا غصب عننا بنساهم في الديموقراطية المزعومة ا اللي بيقولوا عليها ..فيه حلين ،يا اما تقول رأيك و في الحالة هتُستغل انك بتشارك في المسيرة الديموقراطية لما يتساب و تقوله بشجاعة ، يا اما تقعد في بيتكم و تقول دي الصحف دول كلها عملاء ولاد كلب و كلهم تبع الدولة و مش شغال وتتجنن وتموت في بيتك زي جمال حمدان كدة ما مات ، أنهي الأفضل مش تقول رأيك؟ انت بتقول رأيك بس هل رأيك حد بيسمعه؟ لا مفيش حد بيسمعه.. بس دي مش أزمة كاريكاتير دي أزمة صحافة عامة ، كان الله يرحمه رسام الكاريكاتير بهجت عثمان بيقول لي الصحف كلها في مصر بقت عاملة زي صفايح الزبالة احنا يادوب بننقي صفيحة زبالة نظيفة شوية و ننقي منها اللقمة و نمسحها .. يبدو كان عنده حق فعلا ، طلع لي كمان بالمقابل صحيفة واحدة في مصر مفيش عليها كلام.. محدش يقول لك متمولة من حد.. أصله عامل اتفاقية مع مين طلع لي اسم صحيفة واحدة !؟ كلهم هتلاقيهم عليهم كلام بس في النهاية انت ممكن تفعد في بيتك متشتغلش ، اه اشتغلت بس أنا في تجربتي اني أرسم مبارك كنت حريص فعلا نكسر السقف اللي معمول لرسامين الكاريكاتير و كنت بقول لك من الحاجات اللي ضايقتني ان انا مجرد ما مشيت رجع دا تاني للأسف كان نفسي يستمروا.

المحروسة:
بمناسبة الاتهامات و الكلام علي الصحف .. حضرتك بتشتغل في صحيفتين الاتنين عليهم شبهات أمنية .. روزاليوسف و الأسبوع ،خلينا نتكلم بصراحة ..حتي ان الأسبوع يقال انها صحيفة صفوت الشريف ..انت ايه تفسيرك لده طالما انك جوه الاتنين؟

عمرو سليم:
أنا هجاوبك بس قول لي الأهرام مين بيحكمها؟

المحروسة:
الأمن

والاخبار؟ الامن ..
والجمهورية ؟ الأمن ..
والمصري اليوم ؟ تمويل خارجي

عمرو سليم:
تمويل خارجي و مين الممول الخارجي؟ صلاح دياب أكبر ممول و أكبر متعامل مع اسرائيل في مصر دا المصري اليوم مثلا،مين تاني صحف مستقلة عندك؟

المحروسة:
اسمح لي .. المصري اليوم كان في كلام كتير و ملفات اتفتحت في روزاليوسف على المصري اليوم و التمويلات و نفاها الأستاذ مجدي الجلاد و قال ان لو احنا نعرف ان في تمويل خارجي..................

عمرو سليم:
مقاطعا : أيوة بس المصري اليوم و نهضة مصر الاتنين معمولين بتمويل أمريكي و دي معروفة من البداية من قبل ما يصدروا ،و دي اسأل فيها صلاح دياب نفسه معروف تعامله مع اسرائيل

المحروسة:
صلاح دياب مبقاش ممول دلوقتي على حد علمي

عمرو سليم:
صلاح ممول طبعا

المحروسة:
هشام قاسم

عمرو سليم:
صلاح دياب هو الممول الرئيسي هو اللي معاه الفلوس كلها طبعا دي معروفة...أنا بقي اُحيل ليك السؤال ..قولي اسم صحيفة واحد ماعليهاش كلام في مصر ،انت قولت لي روزا اليوسف و الأسبوع ،بس أنا عايز أقول حاجة ... دايما حجازي رسامنا الكبير كان بيقول المهم التاريخ مش الجغرافيا ، يعني مش مهم انت بتشتغل في أنهي مكان المهم ما تقدمه و ما تقوم بيه،الأسبوع ناس يقولوا أمن و صفوت الشريف مش كده؟ سيبك انك سمعت الكلام دا ...الجورنال دا انت لقيت موقفه من اسرائيل مثلا ضد و لا مع؟ بيهاجم الدولة و لا لأ؟ مش دي الصحف المطروحة عندك؟ مش دي الصحف اللي متوافق انها تطلع؟

المحروسة:
حضرتك بتتكلم عن توازنات .. ما هي التوازنات دي بتدفع وجود صوت معارض لاسرائيل بيمثله رئيس تحرير قومي ناصري الأستاذ مصطفي بكري.. دي نقطة ...النقطة التانية: القضايا الداخلية..أيوة طبعا في حدود كبيرة جدا داخل الاسبوع،الأسبوع استُعملت بشكل أو باخر و دي كانت تحليلات كتيرة جدا في قضية ابراهيم نافع و كان في الصدارة الأستاذ مصطفي بكري و حصل ان اتقابل ابراهيم نافع بصفوت الشريف و قال له انت اللي عامل الموضوع و انت السبب........ أهي كل دي شبهات، الناس بتسأم من اللهجة الحادة المعارضة اللي بتخدم النظام في الأول و في الاخر

عمرو سليم:
بداية الوحيد اللي يستطيع الدفاع عن الاسبوع هو مصطفي بكري ،لكن أنا في حاجات معينة بتخليني أشتغل في الصحيفة...خطها السياسي...أنا شايف ان الأسبوع صحيفة معارضة ليها توازنات.. اه ليها توازنات لكن صحيفة معارضة ضد اسرائيل و التطبيع و أمريكا يبقي أشتغل ، بقول رأيي فيها.. محدش طلب مني ان أنا أعمل حاجة مع الدولة، دا المعيار بتاع شغلي،الدستور زي ماحنا اتكلمنا فيها برضو محاذير يعني انت مثلا أما قلت موضوع ابراهيم نافع... طب ما موضوع بنت رئيس مجلس الادارة برضو يضرب في الصميم اللي انت مؤمن بيه أساسا، انت بتقول ضد التوريث و انت بتورث

المحروسة:
ابراهيم عيسي جاب أخوه

عمرو سليم:
ابراهيم عيسي جاب أخوه .. التوريث منتشر بشكل مرعب ، و بعدين كان فيه رسالة على النت ان كل واحد جايب مراته كمان يعني ماعرفش مين جاب مراته

المحروسة:
بثينة كامل و الدكتور عماد غازي

عمرو سليم:
الدكتور عماد غازي و ايهاب الزلاقي و مراته واحمد محمود ومراته و زوجة أسامة خليل

المحروسة:
جريدة عائلية

عمرو سليم:
قصدي ان كل جورنال فيه البلاوي المنيلة بنيلة بتاعته ، بس في النهاية كرسام كاريكاتير في حد أدني من المكان بتشتغل فيه يعني أنا ما قدرش أشتغل في صحيفة اسرائيلية،لوالوطني اليوم قالولي تعالى اشتغل مش هشتغل الاخبار و الأهرام لو قالولي أشتغل اروح أشتغل لسبب مساحة صلاح جاهين أشتغل فيها,, مساحة صلاح جاهين دي بتهدر كل يوم ألف مرة دي أروح أشتغل عشان أحافظ عليها,,,, انت بتسألني روزا,,, روزا دي بيتي يعني أنا أبويا كان فيها و أنا موجود فيها و الناس محتملين حريتي وجرأتي و أنا موجود في المكان مامشيش منه ابدا الا اذا المكان دا عملوا فيا زي ما عمل الدستور مثلا,,,قيدني , لوي دراعي, ساومني علي حاجة,,, أنا طوال شغلي في الدستور و هجومي علي مبارك في الدستور ماحدش هنا( روزا) ضغط عليا بحاجة ما حدش قال لي سيب الدستور ,,أبدا نهائي.

المحروسة:
لم تمنع لك كاريكاتيرات في الأسبوع ؟

عمرو سليم:
فيه طبعاً.. بس في حيز من التفاهم ، يعني ايه... زي ماقولتلك موضوع الدستور،موضوع الدستور غلطوا و قلوا أدبهم و شالوا الرسمتين و اتحجج المشرف بأن ابنه معرفش ايه و ابراهيم عيسى حب يزود العملية اكتر بلوي دراعي ان دي مش هتمشي ، فانا لما لقيت العملية كده أنا اللي لويت دراعهم و قولتلهم دي مش ماشية ومفيش رسومات ليه نزلت في المكان بعد كده خلصت المسألة ، أنا في الوقت دا كان مستعد أصدق شبه اعتذار و حد يقوللي أصل ضاعوا معرفش ايه... هتصدق.. يبقي معناها انه غلطوا و بيرجعوا يبقي في تفاهم .. في الأسبوع ممكن يحصل ايه... ممكن يحصل رسمة أخيرا مثلا اتشال منها العسكري اللي بيرقص...أنا أتصل بمصطفي بكري .. يقولي أصل ظنينا ان الجيش ممكن يتفهم الجيش المصري..معلش تحملنا .. وعبد الفتاح طلعت مدير التحرير مقلكش!؟ أنا هتصل بيه و أقول له ازاي دا يحصل و اسفين

المحروسة:
الاستاذ مصطفى اتصل بيك ؟

عمرو سليم:
أنا أتصل بيه طبعا و أكلمه أقوله على اللي حصل.. فيرد معلش أسفين...كدة اكمل خلاص، لكن أما يقول لك اهو دا اللي عندي و مش هعرض لحضرتك المساحة دي من الأسبوع الجاي..ما دا اللي حصل في الدستور..هتعمل ايه ؟هتقول لا أنا ماشي .. ملعون أبو الجرنان و أنا ماشي و خلصت..لكن لما يكون في تفاهم خلاص ..افترض قاللك مثلا احنا قلقالين جدا من هجومك اليومين دول علي الحكام العرب، دا معرفش مين هددنا ...أنا أبقى مابفهمش لو هاجمت في الوقت دا الحكام العرب .. بس أعرف امتي أهاجمهم تاني،لكن أنا في شغلي مابعملش فرامل علي شغلي..أنا بعمل شغلي و ببعته و خلصت المسألة و بعدها بيكون لي حديث...راقبوا الرسمة شالوا حتة منها..ساعات دي خايفين منها اقولهم نزلولي حاجة قديمة من عندكم

المحروسة:
كرسام كاريكاتير وصحفي معارض...مساحة الخوف عندك منين لفين؟؟

عمرو سليم:
هحكيلك موقفين بمناسبة الحاجات اللي اتشالت يعني.. هديك مثل..معرفش انت توعي علي مجلة اسمها اليسار و لا لأ...كانت بتطلع و دي كانت مجلة شهرية بتصدر من حزب التجمع و كان بيرأسها الأستاذ حسين عبد الرازق و دي كانت صحيفة يسار علي يسار التجمع تماما... صحيفة جريئة جدا،الصحيفة دي أول مرة أرسم فيها مبارك كان في اليسار دي ماكانش في الدستور أبدا و رسمته بعد مرور عشر سنوات علي توليه يعني من 14 سنة رسمت مبارك و شفت كاريكاتيرات بتهاجمه بقوة شديدة.. و حتي خافوا عندي هنا في روزا وايه اللى انت عامله ده حد يعمل كدة!؟..تعالى فورا و خلوني ارسم كتير جدا في مجلة روزا عشان يحموني شوية لانى فى روزا ..في يوم رسمت غلاف اليسار- كنت أنا برسم الغلاف- كنت مرة في رمضان فتحت التلفزيون لقيت خطاب لمبارك، ففتحت القناه التانية لقيت سوزان مبارك بتتكلم عن مكتبة الأسرة ، ففتحت القناة التالتة لقيت دورة رمضانية بيلعب فيها علاء و جمال مبارك..لقيت انها كاريكاتيرة فعملتها اتنين ماشيين واحد بيقول ياسلام مبارك حكومته مش حرمانا من حاجة نفتح القناة الأولي نلاقي خطاب مبارك القناة التانية سوزان مبارك و القناة التالتة علاء و جمال مبارك ، دي المطبعة اللي بيطبع فيها حزب التجمع ورئيسها مشارك فيها( رفعت السعيد) اتصلوا برئيس التحرير قالوا له مباحث أمن الدولة صادرت الغلاف شوفلنا غلاف تاني ، قال لهم مافيش غلاف تاني قالوا له يعني ايه قالهم نزلوا الغلاف فاضي قالوا له ننزله ف وقته قاللهم اه نزلوه ف وقته و نزل فاضي فعلا الغلاف و لعب بالعدد كويس أوي حسين عبد الرازق..بعت الغلاف بالشكل دا لناس ، الحكومة اللي تقلق من كاريكاتير لعمرو سليم تبقي حكومة ضعيفة و تتهز من كاريكاتور مش من حركة شعبية حتي...العدد الي بعده حسين عبد الرازق نقل لمطبعة تانية و كتب قصة الغلاف دا و اتحط غلاف أنا رسمته عن مبارك في الأولى و الغلاف اللي اتاخد دا نزل في الصفحة التالتة،المضحك في الموضوع دا ان بعد شهر أنا كان ليه كناب بيتطبع في المطبعة دي بالصدفة و معرفش ان هي دي المطبعة، قالوا لي انت عمرو سليم قلتلهم اه قالوا كدة برضو تعمل فينا كدة ؟ قلتلهم ايه اللي حصل؟؟قالولي يرضيك ان ستين عامل بيته يتقفل ؟؟ قلتلهم ازاي؟؟ قالي الكاريكاتيرة بتاعتك لولا ان احنا شيلناها كان العمال بيتهم هيتقفل قلتله ملعون أبو الكاريكاتير اللي يقفل بيت ازاي ده!؟؟ أتاري هما العمال من نفسهم تطوعوا لمصادرة الرسمة بدون تدخل من أمن الدولة و لا حاجة يعني رقباء ، الموقف التاني كنت راسم غلاف لليسار كان برضو عن مبارك و تصادف ان أنا كنت قاعد في منطقة في الهرم يبدو ان كان فيها ضباط كتير و كنت لسة باعت الرسمة علي الفاكس..فلقيت صوت ضرب تحت في العمارة انطق و ماعرفش ايه و عمالين يلطشوا بالاقلام..أنا ببص كدة لقيته بيبصوا علي الشباك..يبدو حد بيبص بالصدفة فأنا خـُيل لي ... بس صوت الضرب جامد و بالاقلام فمشيت علي طراطيف صوابعي و ركبي و أبص كدة من الشباك قلت يانهار اسود دا اذا كان عملوا كدة في واحد مهاجمش مبارك أمال يعمل ايه أما يشوفوا الرسمه و قولت يا مين دلوقتي يجيبلي الرسمة وارجعها تاني

و برضو عملي في الدستور أحيانا كنت بقلق جدا يعني بس ماكنش قلق علي نفسي قد ماكان قلقي علي مراتي و ولادي طبعا ، يعني أقلق بالليل أشوفهم أطمن عليهم، ساعات ألوم نفسي و أنا قاعد طب لو أنا حصلي حاجة دول هيعملوا ايه هبقي عملت ايه ، لكن دا كان بيجيلي بس في الفجر بعد ما أرجع من المعممة بتاعة الدستور لكن تاني يوم الصبح الغريبة أرجع بتهوري تاني وابدأ اعمل حاجات اعلى

المحروسة:
خوفك علي (اولادك) زياد ومريم ساعات بيقيدك؟

عمرو سليم:
لا عمره ما قيدني خالص أبدا نهائي و دا العيب اللي فيا اللي أنا مش عايز أغيره..لا فلوس قيدتني و لا ولادي قيدوني خالص، و أنا مراتي جدعة بتقبل تهوراتي و بدون ضيق بشكل غريب جدا، يعني مثلا كنت بشتغل من حوالي عشر سنين في جورنال قطري كان راتبي عالي جدا وقتها و رحبوا بي كويس و صورة في الصفحة الأولي و كاريكاتيرة مستمرة و شغلهم مضبوط يعني مجرد اني بعمل الشغل و ابعته بالفاكس و الفلوس تيجي كل شهر، فجأة الصحيفة القطرية دي هاجمت مصر فشفت الصحيفة فيها تريقة علي مصر و المواطن المصري يا مصري يا شحات يا بتاع القرش ياللي بتنط في الأتوبيس..اتصلت بالراجل-كان مصري- قلتله أنا اسف مش هبعت الرسمة.. قاللي ليه؟ قلتله مش قادر ..أنا فعلا قعدت لقيت نفسي متقيد مش قادر أرسم، قلتله و أنا مستعد أقبل اني أشتغل في وقت فيه مشاكل فعلا بين مصر و قطر لكن أشتغل في نفس الجورنال اللي بيهاجم مصر مقدرش أنا اسف، قال لي احنا بنحترمك و احنا كسبنا صديق و يا ريت كلنا نعرف نعمل زيك و كدة ..فورا.. ومفيش كلمة طلعت من مراتي ان انت كدة يعني ضيعت مبلغ ضخم.. دايما عادتي اني عمري ماتكلم علي رقم و موضوع الفلوس دا بتكسف منه بشكل مرعب لدرجة اني مرة سبت مكان لمجرد انه اداني فلوس كدة مش في ظرف يعني و فَََهِمته ان دا عيب لازم تبقي الفلوس في ظرف و مكتوب عليها اسم و دي عملية( مهينة)انها تتعمل كده...بالتالي دا بيديني حرية ان فورا أول ما أتضايق من مكان أسيبه فورا من غير ما أفكر أنا خسران ماديا أد ايه..أنا حتي بعد أما مشيت من الدستور اتصلوا بيا فلوسك جات قلتلهم لأ أنا مش هقبض ، قالوا ليه!؟ قلتلهم لا مافيش قالولي الفلوس كاملة..، قلتلهم أنا ماشتغلتش الا أسبوع واحد أخد فلوس كاملة ليه؟ قالوا طب تعالي دا بيقولولك تعالي اقبض قولتلهم لا أنا مش جاي مش عايز.. قالولي ليه ؟ قولتلهم الفلوس أنا بعتبرها حاجة كدة زي الاكل بالضبط قولتله افترض انت متضايق من حد هتقدر تاكل معاه؟حتي لو انت دافع تمن الأكل مش هتقدر تاكل معاه.. لا.. أنا بعتبر الشغل حاجة و الفلوس حاجة ، و بعتبر شئ من الاكرامية أوي ان أنا بشتغل معاك و انت تقبضني و انا اخد الفلوس.. حقي اه..بس تفرق اوي انت بتقبض من مين و الفلوس شكلها ايه ومينفعش أبقي متخانق معاك و متضايق منك و أقبل أروح أقبض فلوس منك انت.

المحروسة:
بس أحل من عينيهم يا أستاذ عمرو!

عمرو سليم:
أبدا و الله ما كنت أسامح نفسي أبدا و لحد دلوقتي أتمني ان تكون الفلوس دي فرقوها علي الصحفيين الغلابة يعني أنا متبرع بيها للصحفيين الغلابه

المحروسة:
لو زياد طلع في يوم من الأيام معارض قوي شاب عنده حماس و و اعتقل زي شباب كتير اعتقلوا في أحداث القضاة أو في أحداث نصرة فلسطين.. هيكون موقفك ايه كأب؟

عمرو سليم:
و الله هقول لك حاجة..أنا كلمني من حوالي أسبوع أو عشر أيام محمد الشرقاوي اللي كان معتقل و بيشكرني علي مقال كتبته في الدستور أيام ما كان مسجون، أنا قلتله احنا مكسوفين منكم جدا انتم بتصدقونا و بتنزلوا المظاهرات و بنسخنكوا بمقالات و انتم بتدخلوا بتتبهدلوا و بتضربوا و بتعتقلوا و في الأخر بتصدقونا و احنا قاعدين في تكييف و بنكتب، فقال لي ازاى كل واحد قايم بدوره ..في حين ان أنا شايف ان دا غلط ..أنا شايف ان فعلا مافيش معارضة في مصر ... أنا نزلت المظاهرة بتاعة ميدان التحرير و انا عمال أزق في الأمن والبلطجية أنا دراعي الشمال اتملخ 3 أيام مثلا في البيت و قعدت أسأل نفسي طب لو دراعي اليمين هو اللي اتملخ هعرف أرسم ازاي؟ همارس شغلي ازاي، و بدأت أفكر في حاجات تانية ان محمد شرقاوي أو علاء سيف أو كريم الشاعر دول اللي اتسجنوا و اتحبسوا و انضربوا و البنات الصحفيات اللي انتهكت أعراضهم ... انت اما بتنزل مظاهرة أنا معتقد لازم حد يحمي ظهرك...بمعني ايه؟؟انت نازل تبع مين؟ أنهي حزب بيحميك؟ لو اتقبض عليك مين هيدافع عنك؟نازل بقي ليه؟؟ أنا بيتهيألي ان أي حركة تظاهر بره لأن عندهم معارضة ناضجة و أحزاب ناضجة معروف ان الحزب دا عامل المظاهرة دي..أنا فرد في الحزب دا بالتالي لو اتقبض عليه الحزب دا هيحميني و هيطلعني و أنا طالع ليه؟ طالع لأن في دماغي مشروع لبديل ..ايه هو البديل؟ أنا عارفه و بطالبه بطالب بحاجات ..لكن انت هنا في مصر الناس اللي بيتظاهروا عشان مقالة سخنة قروها... مين حمي الشرقاوي؟ احنا عرفنا نحميه بمقالاتنا!؟ معرفناش نحمي حد..في حزب بيحميه؟؟مافيش دا صدقنا..دا في النهاية نازل ليه الشرقاوي!؟ هما عايزين يغيروا بس هل في حد بيحمي ضهرهم دول؟

المحروسة :
يعني بتشوف دور المثقفين و النخبة دور تنظيري و حماسي فقط؟ وانهم هيفضلوا قاعدين في الغرف المغلقة مابيقوموش بدورهم.. مبينزلوش حتي يختلطوا بالشعب و يختلطوا بالشباب؟

عمرو سليم:
عشان كدة أنا قولتلك بحترم فصيل الاخوان لأنه قادر ينزل صح، قادر يبقي مع رجل الشارع صح...اليسار مش عارف يعمل كده ، اليسار لأن في نسبة مثقفين عالية مُعتقد انه دايما هيظل مترفع فوق بيكتب مقالات و الناس بتقراه و المثقفين و التنظير، لكن هو مش دور مثقفين أد ما هو دور أحزاب و أد ما دور دولة لازم الدولة تبقي دولة بحق و حقيقي ماتبقاش ماكيت دولة..الدولة بحق و حقيق تكون دولة قوية اقتصادها يعمل انك تقدر يكون قصادك أحزاب قوية و انت قادر تخش انتخابات حرة قصادهم و قادر تنجح لأن الناس بتحبك فعلا انك بتعمل خدمات لكن دلوقتي فعلا هو مش دور مثفقين بس هو دور أحزاب عشان الأحزاب تبقي قوية فعلا لازم الدولةتوافق على الأحزاب القوية اللي عايزه تطلع...لكن انت قوللي عن وجود حزب واحد في مصر بحق وحقيقي..مافيش, احنا عندنا حوالي 22 حزب مافيش ولا واحد منهم علي الساحة.. و لا واحد ،مجرد جرايد يعني الوفد جورنال الحزب الناصري جورنال العربي

المحروسة:
العربي أحيانا بتعتبر جريدة مستقلة كمان

عمرو سليم:
اه و العربي أحيانا بتعتبر جريدة مستقلة لكن فين دورهم دول ؟ يعني أنا فاكر في مرة من المرات ساعة لما مبارك اتضرب عليه نار في أديس أبابا كنت ساعتها بشتغل في جريدة العربي و جريدة الأحرار و فجأة لقيتهم بيتصلوا بيا في الأحرار و كان أيامها برضو مصطفي بكري هو رئيس التحرير ..يا أستاذ عمرو مبارك اتضرب في أديس أبابا عايزين كاريكاتير بسرعة، قولتلهم أعمل كاريكاتير بس أفهم اللي حصل، فبدأت أعمل كاريكاتيرات مع التغيير و هما قالولي لا دي ماتنفعش البلد مقلوبة عايزين حاجة محايدة و أقوللهم أنا مقدرش أعمل كده، و بدأت أعمل كاريكاتيرات برضو في العربي تترفض لأنها في الوقت دا ضد مبارك و مبارك مضروب عليه النار و الأحرار يرفضوا و العربي يرفضوا و أكتر حاجة ضايقتني ان دول كلهم فجأة-اللي بيقولوا لا لمبارك لا لمبارك-وقفوا في طابور و مبارك جاي من أديس أبابا و بياخدوه بالحضن و بيبوسوه و كأن العملية تمثيلية..أنا مش مع التغيير بالرصاص أنا مع التغيير الديموقراطي بس برضو لازم أفهم المعارضة دول بيعملوا ايه!!؟ أنا حسيت انها حاجة مضحكة بتحصل قصادي..أنا يوميها عملت حوالي10 كاريكاتيرات اترفضوا علي التناوب في الأحرار و في العربي..اتصلت بحسين عبد الرازق كنت ساعتها سيبت اليسار بقالي فترة، قلت له يا أستاذ حسين أنا عندي كاريكاتيرات اتعملت ضد مبارك في موضوع أديس أبابا و منزلتش، قاللي ابعتهالي، بعتهاله علي الفاكس و كلها نزلت و اتذكر تحتها رفضت في كذا و كذا.. يعني قصدي ان ده ماكيت دولة و كل حاجة فيها أشبه بحاجة، يعني احنا مفيش عندنا صحف.. عندنا ماكيت صحف.. شبه صحف ..،مفيش عندنا مغنيين عندنا شبه مغنيين معندناش صحفيين عندنا شبه صحفيين ماعندناش تلفزيون عندنا شبه تلفزيون ماعندناش حاكم عندنا موظف شبه حاكم معندناش وزرا بل شبه وزرا ماعندناش أحزاب بل شبه أحزاب

المحروسة:
احنا كلنا كده اشباه!!

عمرو سليم:
ماكيت..ماكيت دولة بالفعل..عشان نغير دي محتاجة وقت بالتالي اللي بينزلوا المظاهرة و بيتضربوا دول لازم حد يحميهم ...لازم حزب يحميهم..يعني أنا أما رحت مظاهرة بتشتم مبارك لكن قوللي البديل فعلا ايه؟البديل ايه بتاع التظاهر.؟

المحروسة:
بمناسبة شتم مبارك . انت ايه رأيك في موضوع اهانة الريس!؟

عمرو سليم:
رأيي انها حاجة عبيطة طبعا يعني دي كلمة عبيطة اتقالت و بعدين لازم الناس دايما تفرق بين نقد الحاكم و اهانته، مافيش اهانة بتحصل... دا نقد بيحصل.. و بعدين شخصية مسؤول دايما معرض للنقد.زي ما هو بيغلط يستحق النقد

المحروسة:
انتوا بتشتموه مش بتنتقدوه

عمرو سليم:
ازاي؟ انت لمحت شتيمة في شغلي؟؟

المحروسة:
لا مش شتيمة مباشرة لكن في حاجات كتير بلال فضل كان بيكتبها وبتترجمها ...

عمرو سليم:
دي تقول بلال لكن أنا عن نفسي انت لمحت شتيمة في كاريكاتيراتي عنه؟

المحروسة:
في رسومات بتبقي أبلغ من الشتايم

عمرو سليم:
مانا عارف بس مافيش شتيمة (ضحك)

المحروسة:
في حاجة لفتت انتباهي في قلمين ..كان في خط قوي جدا من أيام الاستفتاء و الانتخابات التشريعية..خط مهاجم للرئيس بشكل قوي وبلال فضل كان بيكتب حاجات قوية جدا جه بعد كدة حدة قلمين خفت شوية و خصوصا حدة بلال فضل و كتب عن أدب الاختلاف. انت ايه رأيك في الموضوع ده؟

عمرو سليم:
لا حقوللك حاجة من داخل الدستور..احنا جه في وقت قبل الموضوع الأخير بتاعنا داه أنا و بلال جالنا اكتئاب مرة واحدة في وقت واحد فقررنا ان احنا نتوقف شوية في قلمين، فابراهيم ألح انها تفضل موجودة، لدرجة أنا أقول لبلال معلش اكتب و معرفش ايه و نزق و أحيانا بيجي زهق ،و بعدين حصل حاجة مفسره ... حصل اتفاق و كنا هنروح نرسم في جريدة المصري اليوم برغم ان أنا بقوللك ان صلاح دياب أكبر متعاون مع اسرائيل ولكن المصري اليوم جريدة برغم كدة أنا بحترمها طبعا..بحترم الاختلاف بتاعهاوالصديق مجدي الجلاد صحفي شاطر جدا...الصحفيين اللي هناك بينزلوا فعلا الشارع...قادر المصري اليوم يلعب في منطقة ما بين الصحف المستقلة مابين الصحف الهزلية و الصحف القومية و دا حاجة تتحسب له طبعا و دا اختلاف هوعامله كويس جدا ، كان في مشروع أنا و بلال هنروح المصري اليوم هو بيكتب حاجة و أنا برسم و فعلا ودينا الحاجات و وحصل ان روزا هنا المرة دي خيروني فعلا... بس أنا قلت أخليني في روزا المرة دي..الموضوع وصل لابراهيم عيسي فابراهيم اتضايق جدا و اتهمنا اتهامات غريبة جدا

المحروسة:
اتهم بلال فضل صديقه !؟

عمرو سليم:
اتهمني أنا و بلال

المحروسة:
ايه الاتهامات؟

عمرو سليم:
ان احنا بنبيع الدستور و ان احنا عايزين نكوش هنا و هنا و ان احنا عاملين الدستور فاترينة و ان هو صاحب الاختراع بتاعنا و بلال و الاختراع دا ازاي يبقي برة؟ و ان هو ازاي محدش يقوله؟

المحروسة:
و بلال رد علي الاتهامات دي بايه؟

عمرو سليم:
لأ... بلال مظهرش خالص

المحروسة:
انت شايف ان بلال فضل مش واضح فى مواقفه بالنسبة لابراهيم عيسي؟ بغض النظر عن العلاقة الانسانية، انت بينك و بين مصطفي بكري برضو علاقة انسانية و بتحترمه و ابراهيم عيسي بينه و بين بلال فضل علاقة انسانية و بلال بيحترمه في دا و أحيانا بيقف جانبه يساندة و قال ان في أزمة الدستور بيحاول يصلح لكن في مواقف لازم الانسان ياخد فيها موقف واحد يابيض يااسود....انت شايف ان بلال فضل سلبي في الموقف أو في عدم تقبل ردود الأفعال السلبية تجاه سياسة ابراهيم عيسي و بيساندها علي غير وجه حق؟

عمرو سليم:
لأ لأ.. دي مش في بلال، أصل بلال متعرضش للموقف اللي أنا اتعرضتله دي أول حاجة بالتالي أنا مرغمهوش انه ياخد موقف هو متعرضلوش..

تاني حاجة في المصري اليوم دي بلال قرر ساعتها و أنا قررت ان احنا مانشتغلش تاني في الدستور خلاص خلصت المسألة علي كدة، و بلال برضو رفض يشتغل قلمين و بس وعدي حوالي 3-4 أيام و تدخلت نجلاء بدير في الموضوع بتاعي و اتصل ابراهيم عيسي : يا عمرو انت مالك متضايق من ايه طب أنا اسف و بعتذرلك..قلت له مفيش حاجة يا ابراهيم و رجعت تاني، و بلال أصر انه ميشتغلش و حتي أنا اللي اتوسطت في الموضوع لدرجة ان كان في ناس قاعدين على القهوة خليتهم يكلموا بلال لأنهم سألوني أما قعدنا أسبوع مبنكتبش قلمين..بلال فين و خليتهم يكلموه بالتليفون و كلمته و شايف الناس ازاي بتحبك و لازم ترجع تكتب و رجع... كان في موقف لبلال هو أصر انه ميرجعش فيه لأن الموقف ده مسه برضه .. اللي هو موقف المصري اليوم

المحروسة:
اللي هو كلام ابراهيم عيسي انكم واخدين الدستور فاترينة

عمرو سليم:
بالظبط..أنا امتنعت اني أروح الدستور و بلال امتنع و خلصت لحد ما تدخلت نجلاء بدير و ابرهيم كلمني يا عمرو أنا اسف طب انت زعلان مني يا سيدي تعالى اضربني بس مال القراء بيك؟ متخانقين احنا مع بعض..نقطع بعض بس القراء ذنبهم ايه؟

المحروسة:
أنا ملاحظ انكم مبتحطوش اعتبار خالص للقارئ

عمرو سليم:
نهائي ..لا ازاي القراء علي راسي من فوق، بس في اعتبار لكرامة الشخص يعني يستمر و لا لأ..أنا في ناس كتير بعتولي بعد الدستور طب احنا ذنبنا ايه؟؟ طب قوللي انت لو مكاني هتعمل ايه؟ ترجع عشان القارئ؟ ما انت لو ترجع عشان القارئ اتقصقص ريشك كله ، انت القارئ يحب فيك جرئتك يحب فيك خبطك ،أما انت كل ما هتيجي تخبط هتخاف دا الكاريكاتيرة هتتشال أو هتتصادر أو يقوللك ابني و بنتي،هتعرف تشتغل شغل يحبه القارئ؟ يبقي انت كدة احترمت القارئ ، يا اما تجيبله الحاجة اللي هو عايزها صح مية المية و تخليه مايفقدش ثقته فيك يا اما تمشي أفضل ،و دا اللي حصل,,,أنا احترمت القارئ ..أنا لو مابحترموش كان زماني فضلت و قعدت أعمل شغل باهت و كنت أسأت لنفسي و أسأت للقارئ و ضحكت عليه، اني أوهمته اني بعمل كاريكاتير جرئ هو كاريكاتير ميت,,,,أنا احترمت القارئ طبعا.

المحروسة:
محاولتش تعمل اصدار مستقل برسامين الكاريكاتير خاصة اللي انت دورت عليهم وجبتهم الدستور؟

عمرو سليم:
في أمانة أنا بحترمها، أنا كنت بشغل موقعين في نفس الوقت.. المشرف علي الكاريكاتير في روزا و مشرف علي الكاريكاتير في الدستور..فكان ساعات يجيلي مثلا واحد روزا قابلني ..قلت له شغلك كويس جدا تعالي أعرفك علي المشرف الفني في روزا..قالي لا لأ..أنا عايز أروح الدستور...قلت له لا دي الأمانة بتاعتي و أنا في روزا متخلينيش اخد حد و أنا في الدستور،انت اقعد في بيتك و فكر و شوف انت عايز ايه، ففكر و قال أنا عايز أروح الدستور..بالتالي أنا كنت محترم جدا الأمانة دي...ما قدرش أخد رسام من الدستور أخده روزا حتي لو اتخانقت مع الدستور ..أبدا دي أمانة..دول بتوع الدستور .. مقدرش في المقابل أمسك رسام من روزا أقوله تعالي الدستور و سيبك منهم دول ولاد ..مينفعش لكن في المقابل لو رسام قاللي أنا عايز أروح كذا...مينفعش بقي أفرغ الدستور من الناس خالص الا اذا برضو هما أصروا انهم ييجوا ، هشام رحمة مشي بعدي اللي كان رسام في الدستور برضو اتشال شغله فمشي أنا معرفش هو فين هشام دلوقتي، مقدرش أفرق مكان لكن لو أتيحت لي التجربة تاني هطلع ناس تاني و كل ما التجربة تتاح ليه هطلع ناس تانية و أنا يهمني أوي يبقي في مليون رسام كاريكاتير في مصر متبقاش العملية مقفولة علي اتنين تلاتة بس

المحروسة:
اللي كنت أقصده هو تكوين مجموعة رسامين جدد انت تبنيتهم أو رشحتهم لموهبتهم طبعا.. محاولتش ان انت تجمعهم و تعملوا اصدار أو تشوفوا دار نشر تعملوا تنشرلكم ؟

عمرو سليم:
دي فكرة كويسة مفكرتش فيها لكن دورلي انت علي ناشر و نعملها و الله بجد

المحروسة:
و تديني نسخة هدية عشان أنا صاحب الفكرة؟

عمرو سليم:
أديك عشر نسخ والله و أكتب القصة دي تمت ازاي ان أنا كنت قاعد معاك و انت قلت لي كذا و جمعتهم و عملنا الكتاب

المحروسة:
تقييمك لتجربة أحمد رجب و مصطفى حسين

عمرو سليم:
هي أفادت و مفادتش..أنا بحترم جدا جدا موهبة مصطفي حسين كرسام و بحترم جداجداجدا موهبة أحمد رجب ككاتب ساخر و بيقدموا خدمة للقارئ فعلا ، لكن أنا عايزك تقارن التجربة دي أما راح منها أحمد رجب هل بقيت فيه احساس تجربة؟؟ بتحس ان المُنتج بقي كويس؟

المحروسة:
و راح منها مصطفي حسين

عمرو سليم:
و راح منها فعلا مصطفي حسين..يعني الأول راح أحمد رجب..فقل مصطفي حسين ..دا اللي أنا قصدي أقوله..بعد ظهور التجربة دي الفريدة من نوعها..بقي يتسئل دايما رسام الكاريكاتير مين اللي اللي بيكتب لك الفكرة؟ دا خطر علي رسام الكاريكاتير...أنا بقوللك احنا كدة بنرجع..رسام الكاريكاتير كان علي أيام صلاح جاهين في الستينات و السبعينات و أول التمانينات هو اللي بيعمل الفكرة بتاعته....وجودهم ممكن يظهر رسامين كتير معندهمش أفكار و حد تاني يفكرلهم دا أنا مش بحبه..أنا مؤمن ان رسام الكاريكاتيرممكن يكون الفكرة نمرة واحد فيه...يعني أنا في كاريكاتيرة نزلتها في روزا من حوالي أسبوع عن الوحدة العربية كتبت الوحدة العربية و سبت الكادر كله فاضي و بس.. دي كانت الفكرة،حد لسه سائلني امبارح قاللي كان في كاريكاتيرة انت كنت عاملها و فاضية ، قلت له أنا قاصد ان مافيش حاجة اسمها وحدة عربية و الرسمة فاضية..دا قصدي ان البطل دايما في الكاريكاتور هو الفكرة بتاعته. مش الرسم أد ما تكون الفكرة فاحنا كدة أما بنفرغه من محتواه بيبقي خطر أوي

المحروسة:
تقييمك لتجربة جاهين

عمرو سليم:
صلاج جاهين دا أستاذ.. أنا كان نفسي أقابله ...صلاح جاهين قبل ما يموت بحوالي أسبوعين بالضبط شوفته في اشارة مرور في جامعة الدول العربية و ساعتها لا كنت قررت أبقي رسام كاريكاتور و لا كان في دماغي ، كنت مجرد طالب في معهد اسينما قسم رسوم متحركة...لو كنت ساعتها عارف اني هبقي رسام كاريكاتير كنت هجري أفتح باب العربية و أبوس ايده...بعد كدةه ظهرلي في الحلم كتير و كان بيعمل حاجة ظريفة أوي في الحلم..كان بيرسم موج بحر و فيه مركب صغيرة ودايما بيجيلي و هو لابس روب مخطط زي اللي كان بيطلع فيه في الكاريكاتورات بتاعته..فأنا أمسك القلم وارسمها ماعرفش أرسم البحر و لا أعرف أرسم المركب، ألاقيه ييجي تاني و يبص للرسمة بتاعتي اللي علي الحيطة و يهز دماغه اني معرفتش أرسم و يمشي ، بعدين أمسك القلم تاني و أبدأ أعملها فتيجي معايا صح فألاقيه جاي من بعيد و بيحضني..اتكرر الحلم تقريبا مرتين تلاتة بنفس الطريقة، أنا بعتبر صلاح جاهين مش هيتكرر و بعتبره عبقري زمانه ، أنا بيتهيألي ان أي حد بيصنع البهجة و بيخلي الواحد بيبتسم مكانه الجنة و شايف ان صلاح كان لازم يتكسر في67 يعني زي مانت ممكن تصدق حاجة وزي مانا قلت لك أنا بس أخشي علي الناس ان ممكن يصدقوا حاجة و متطلعش هي...ياما صلاح جاهين حس بعد 67 انه مسئول انه أحد أسباب ان الناس شجعوا عبد الناصر و اكتأب و يقال ان هولما مات عبد الناصر قال أحسن، وبعدين بعدها بحوالي 6-7 سنين جت سيرة عبد الناصر قعد يبكي بكاء مرير بصوت، يعني دليل علي أد ايه قلبه قلب عصفورة قد ايه بيحس و كان فنان لطيف جدا ، ناهيك بقي عن ان هو كمان عمل مدرسة كاريكاتير مرعبة..انت أما تشوف الشغل اللي عامله في صباح الخير غير خالص الشغل بتاع الأهرام..متقارنش خالص..حاجة مرعبة طبعا.

المحروسة:
كنت بتستعين برسومات كتيرة لبهجت عثمان..سر حبك لبهجت عثمان؟

عمرو سليم:
بهجت عثمان بدأت العملية بموقف غريب جدا..الموقف دا كان اتعمل معرض للكاريكاتير في مجمع الفنون..جمعية الكاريكاتور عملته و قالوا كل واحد يجيب 3 أو 4 رسومات أنا خدت الرسومات..نقيت رسومات عن اسرائيل و أمريكا.. اتفاجئت كل الرسومات اللي عن اسرائيل و أمريكا متشالة من المعرض ومنزلين لي رسمة واحدة عبيطة ، معرفش مين اللي عمل كده و كتبت مقال ان جمعية الكاريكاتير بتحاول اخصاء فن الكاريكاتير و بتلغي دوره السياسي، و الوقت ده كانت اسرائيل بتضرب الفلسطنيين جامد ، بناء عليه أصريت اني أعمل معرض مناهض لمعرض جمعية الكاريكاتير اللي هما عملوه

روحت نقابة الصحفيين و اتفقت علي معرض يتعمل مع الفلسطنيين و ضد اسرائيل و أمريكا و رحت لميت رسومات من فنانين اخرين اللي مشتركوش في المعرض بتاع جمعية الكاريكاتير، و جاتلي فكرة اني اخد رسمة لرسامين قدام كمان رحت خدت شغل من محيي اللباد و خدت شغل من جورج البهجوري و خدت شغل من بهجت عثمان..كان أول مرة في حياتي أقابل بهجت عثمان، قال لي أنا عارف شغلك و بشوفه و مبسوط منه بس ايه لازمة اللي بتعمله دا؟ ا قاللي أنا من زمان بطلت كاريكاتير و زهقت منه..انت جايللي دلوقتي عايزني بعد ما بطلت حرب عايزني ألبس البدلة غصب عني و تمسكني البندقية و أقف في الطابور تاني! قعدت أفهمه ان انا من غير دعمكوا مش هساوي حاجة و دول هيكلوني و دول بيحاولوا يعملوا كذا و كذا..انتوا الكبار لازم تقفوا جانبي...يبدو اني أقنعته.. لقيته فعلا قام و أداني 7-8 رسومات بتوعه متنشروش قبل كده كان ضد اسرائيل و أمريكا..خدتهم و كنت فخور جدا بيهم..بعدها بقينا أصدقاء و سافرنا مع بعض سوا سفريات و بدأت أقابله مثلا علي الأقل مرة في الأسبوع كان معادي معاه 6-7 الصبح أروحله البيت..اكتشفت ان هو بيصحي بدري زيي اقعد معاه من سبعة لتسعة أوريه رسوماتي يوريني رسوماته كان متواضع جدا و أب فعلا

المحروسة:
تقييمك لتجربة حجازي

عمرو سليم:
بص كل جيل الستينات دا جيل عظيم جدا و حجازي برضو أنا متذكرله حاجة جميلة جدا...حجازي فجأة عمل حاجة غريبة أوي،لقيت والدي في يوم- والدي كان صديق لحجازي- داخل علي ومعاه كتب كتير..حوالي 12-13 كتاب..ايه دول؟..قاللي دا حجازي باعتهم لك كتب كاريكاتير و كتب من بره..كتب من النوع اللي تسافر عشان تشتري الكتب دي و سعر كتاب مكتوب عليه مثلا 500 جنيه....و رفض اني أرجعهم و لحد دلوقتى عندي...دون سابق معرفتي بيه لحد مالقيت تليفون في يوم منه بيكلمني : أستاذ عمرو الفنان عمرو..مين ؟ أنا حجازي..ياخبر يا أستاذ حجازي أخبارك معقول دا انت بتتكلم؟ قاللي انت شغلك هايل أنا عازمك عندي علي العشا النهاردة ،وحجازي كان له تقليد بيعمله انه هو دايما يوم 22 معاد تسليم رسالة مجلة ماجد كان بيدعو فيه الرسامين و الكتاب أصحابه و يعزمهم هو اللي يعزمهم علي العشا...يجيب جمبري يجيب كباب و كفتة ، أنا كنت معزوم مع الرسامين الكبار بدون سابق معرفة و قعد يكلمني عن الكاريكاتور و ازاي أنا شغلي كويس..دي فرقت معايا جدا

المحروسة:
طب مين من الجدد انت شايف انهم ممكن يأثروا في حركة الكاريكاتير و يضيفوا ليها ميكونوش مقلدين

عمرو سليم:
شايف طبعا كل كتيبة الدستور اللي رسموا معايا،شايف وليد طاهر كويس أوي... شايف هاني شمس، مخلوف ، عبدالله ، و رسام جديد اسمه عبد الرحمن، بنوتة جت قبل مامشي بتلات أسابيع اسمها دعاء العدل بنت ممتازة ربنا يحميها...بعتبرها أول رسامة كاريكاتيرية مصرية محترفة بنت كويسة أوي...عايز أقولك حاجة برضو.. ان الرسامين دول كلهم كمان لا يزال في تواصل بيني و بينهم..مايفوتش اسبوع الا و ألاقي حد فيهم جاي بيوريني شغله بيطلب نصايحي ...كلهم ممتازين و اخواتي و دول كلهم أعتقد انهم اللي هيغيروا فعلا وجه الكاريكاتير في مصر..دعاء شغلها هايل دلوقتي في صباح الخير...مخلوف بقي بيرسم الغلاف بتاع الأهرام الاقتصادي..هاني شمس بقي في أخبار اليوم دلوقتي، يعني حاجة هايلة

المحروسة:
ننتقل الي اخر فقرتين عندنا، اولا ايه ,تقييمك للوضع السياسي بعد تعديل المادة 76 و انتخابات مجلس الشعب و نجاح الاخوان...تقييمك للمشهد السياسي الحالي بعد هذه الاحداث

عمرو سليم:
أنا شايف ان السؤال صعب شوية لأن مافيش مشهد سياسي خالص، أنا شايف ان البلد خالية من أي شيء و شايف ان اللي انت بتشوفه في الشارع دا مظاهرات يائسة من ناس يائسة فعلا.. يائسة من عيشتهم يائسة من كل شئ يائسة من التغيير ..شايف العملية مسألة وقت، شايف للأسف الشديد- و يبدو الكلام هيكون محبط شوية- ان مفيش قوه شعبية هتغير،مش عارف البديل ايه لكن أنا شايف العملية مسألة وقت هتنتهي بوفاة حاكم ومجيء حاكم اخر، بس حاسس ان مش جمال هو اللي هيحكم

المحروسة:
لو تم التوريث..في رأيك حالة البلد هتبقى عاملة ازاي؟؟؟

عمرو سليم:
هتفضل كل الأمور علي ماهي عليه بالظبط

المحروسة:
مش هتكون أفضل؟؟

عمرو سليم:
علي ماهي عليه بالمللي.. الشلة هي الشلة....هيا هيا ،ما انت عندك عربية نازلة منزل هتفضل نازلة المنزل دا لحد ماتشوف اخر المنزل دا ايه،احنا في منزل حاليا و بننزله بسرعة شديدة جدا بدليل ان في حاجات كانت تحركنا زمان دلوقتي مبقيتش تحركنا أبدا، والدليل علي كدة التغير في صفحات الحوادث دليل ان في حاجة اتغيرت في كيمياء الناس نفسها يا اما زيادة نسبة التلوت اللي في الجو يا اما ضغوط خارجية غريبة،انت بتشوف انهاردة حوادث مش حوادث جرايم دي حوادث تَـشـَفي ناس في بعضها..قتل و دبح ,,,حاجة مؤلمة جدا جدا ....أنا شايف ان المجتمع اتغير للأسوأ في كل شئ و شايف ان كل شئ خادع في المكان زي ما نا قولتلك احنا عايشين في ماكيت ،حتي أنا كتبتها في الدستور زي بالضبط ما فكروني في أول يوم دخلت فيه استوديو تصوير..و كنت فاكر المكان مباني حقيقية ، وطلع مجرد انك تلف من وراه تلاقيه واجهات خشب و بس...أنا حاسس ان كل حاجة دلوقتي ماشية ماكيت و بس و شايف ان الحكومة محظوظة جدا جدا بنسيج المواطن المصري..المواطن المصري دا بيوائم نفسه علي أي شئ لو هو قاعد في قصر و فجأة هديته و اديته أوضة هيعيش في الأوضة دي و يأقلم نفسه ، لو في يوم قام و لقي الأوضة دي اتاخدت و فضلت حتة بلاطة هيأقلم نفسه علي البلاطة و يقعد

المحروسة:
عشان كدة نظيف بيقول الشعب عايز حد يرضعه؟

عمرو سليم:
يبدو كدة ..يعني شوفت البجاحة وصلت لحد ايه .. انت شايف ان كان عنده حق؟

المحروسة:
مجربتش .... بس مفروض نشوف حد يفطم الحكومة الاول

عمرو سليم:
اه طبعا.. أنا شايف ان دول كلهم جم في غفلة من الزمن..دول كلهم مايصلحوش و لا كانوا يحلموا يعدوا علي باب مصر من برة حتي، فجأة سمح لهم بالدخول و فجأة قعدوا علي كراسي و فجأة حطوا على الكرسي شلتة يعدوا عليها و فجأة لبسوا لبس مش بتاعهم و واسع عليهم ،شايفها مسألة وقت و هو يبدو ان للأسف اختراع رئيس سابق دي أدامنا كتير علي مانوصل لها..مافيش كلمة رئيس سابق أبدا في مصر,,يعني الراحل و بس و شايف دي كمان في الوطن العربي كله ، عملية غريبة جدا كأننا بسكليتة بتتأجر و بييجي اللي بعدها يأجرها تاني و خلصت

المحروسة:
ايه تقييمك لجريدة روزا اليوسف اليومية

عمرو سليم:
بص هقوللك حاجة ،أنا طبعا هدافع عنها لأن أنا من المكان دا عشان الناس ماتظنش ان أنا بقول كلام عقلاني... دا مكاني أولا و أخيرا ..روزاليوسف في مأزق طبعا..أولها مأزق سياسي..انها موروطة مع أمانة السياسات.. انت بتلعب كورة؟

المحروسة :
اه

عمرو سليم:
روزاليوسف بالضبط عاملة زي الاسماعيلي ...يعني انت ممكن تقول علي الأهلي حزب الوطني..الاسماعيلي دايما يبهرك بحريفته و اللعيبة اللي بيطلعوا معرفش بيطلعوا ازاي وسط فلوسهم القليلة و دايما مياخدوش الدوري..فزي ما الاسماعيلي أدائه حلو روزا كان فيها نسيج جميل جدا علي مدي سبع سنين متوالية انتهى النسيج دا... اتدمر...ارجع لروزا أيام عادل حمودة و أيام صلاح حافظ دي روح روزاليوسف بحق و حقيقي..في رأيي أي حد يمسك روزاليوسف من ولادها حتي لو كان عبد الله كمال أفضل ألف مرة من حد يجيلنا من الأهرام زي ما حصل فينا في السبع سنين اللي فاتوا، أنا كنت كتبت مقال أول ما عبد الله كمال مسك روزا و حسيت ان في روح مختلفة في روزا،دي المقالة الوحيدة اللي اعترض عليها ابراهيم عيسي و قاللي مش فاهم بتمدح في ايه في مجلة الشرطة دي...أنا يوميها برضو قطعت المقال..بس نزلته بعد كدة أما اتعمل معايا حوار في جريدة الخميسنزلته كامل،أنا رأيي ان روزا دي عاملة زي مصر

المحروسة:
زي مصر !!!؟ هي مصر ناقصة يا استاذ عمرو اسمح لي !

عمرو سليم:
هقوللك حاجة مصر حاجة جميلة جدا وكانت حاجة جميلة جدا عن الفراعنة و ياما مصر ييجي عليها ناس كويسين و ناس وحشين لكن دايما مصر بتفضل مصر...روزاليوسف هتضل روزاليوسف مهما جت عليها لحظات ضعيفة و لحظات قوة ،انت بتتكلم عن الجورنال و لا المجلة؟

المحروسة:
الجورنال.. بتكلم عن الصحيفة اليومية

عمرو سليم:
الجورنال أسهل أتكلم عنه من المجلة..مبدئيا شايف المجلة بتتقدم و شايف ان احنا بنكتسب فيها مساحات جرأة كويسة، و لكن أنا شايف انه صعب أوي تحكم علي أي جورنال بالذات لو جورنال طالع في ظروف زي روزاليوسف و هو مبقالوش سنة يعني تم سنة من 3-4 أيام ، يعني من القسوة برضو ان انا نحكم علي الجورنال و هو فات سنة عليه...سنة في عمر الجرايد يعني..!! انت عندك المصري اليوم يعني ظل ميبيعش لمدة سنة و كان توزيعه قليل و بدأ يعلى من الانتخابات وبدأ يعمل طفرة في التوزيع و بدأت الناس تصدقه و هو من الاول كويس...نفس العملية في كل اصدارات الأهرام... مفيش صحيفة قومية ما بتتبيعش، لكن في نفس الوقت متفكرش في روزا زمان علي انها روزا دلوقتي دا اللي يبضعف المقارنة أوي

المحروسة:
لا اللي يضعف المقارنة ان تطلع صحيفة روزاليوسف اليومية في توقيت معين و بنهج معين و بخط سير مايتغيرش وبرضه قيس علي كدة التوزيع

عمرو سليم:
طيب انت متوقع ايه في صحيفة روزاليوسف هتطلع تقول يسقط حسني مبارك!؟لا.. يسقط جمال مبارك!؟؟لا اللي انت متوقعه في روزاليوسف...يعني ليه الناس مستغربة من روزاليوسف..الناس مستغربة من روزاليوسف لأنها عارفة ان روزاليوسف دىا زي الأسماعيلي,,,الأداء الحلو الصحيفة الحلوة الجرأة...دا اللي احنا بنحاول نعمله دلوقتي في الجورنال...أنا بقي عايز أقول لك حاجة،شوف روزاليوسف في أول عدد و شوفها دلوقتي..هتلاقي أكيد تغيير أفضل...هتلاقي ماكيت أفضل هتلاقي الشكل أفضل هتلاقي في مساحات بقت أحسن هتلاقي صفحات الرأي كويسة..هتلاقي في اعتناء بالصورة هتلاقي مثلا موقفها في الحرب الأخيرة أقوي من صحف كتير مثلا يعني من متقارنش مثلا موقف روزاليوسف من حرب لبنان بموقف الأهرام و الاخبار ...موقفها أقوي بكتير

المحروسة:
دي كلها لعبة توازنات زى ما حضرتك عارف

عمرو سليم:
أيوة ماهو كل جورنال في الدنيا لعبة توازنات مانا هقوللك في الدستور هقول لعبة توازنات الأسبوع كذلك الأهرام الاخبار الجمهورية .....بص.. روزا متتوقعش انها ماتبقاش صحيفة حكومية, هي صحيفة حكومية تماما..المشكلة بس انت ازاي تلعبها صح.. أنا شايف النبرة دي بدأت تخف شوية..أنا شايف لأن أنا جواها..انت براها و مش مقتنع بيها...و يظل دايما الصحف اللي بتبرق هي صحف المعارضة لأنها الأصدق طبعا و دا أنا معاه تماما....لكن أنا وجودي في روزا مبعملش حاجة يعترضوا عليها يعني مش يعترضوا عليها ...

المحروسة:
ضد الخط العام يعني

عمرو سليم: لأ مش ضد الخط...أنا بعمل حاجات تكسر الخط طبعا كتير جدا و دايما بس مفيش حاجة ممكن يعملوها معايا أحس انها تكبل حريتي،همه عارفين ان أنا ضد الخط بتاعهم دايما و بعمل حاجات ضدهم بس في نفس الوقت أنا عارف السقف بتاعي طبعا كويس

المحروسة:
هي مش طالعة تقول يسقط حسني مبارك و لا جمال مبارك بس طالعة تخبط و تشوه كل المعارضين ،يعني بلال فضل عملوله مطلوب للمحاسبة الاخلاقية قعدت شهر أو أكتر

عمرو سليم :
هما أخطأوا في كدة طبعا

المحروسة:
و حضرتك كنت جوه روزا لان فيه ناس بتقرا الدستور مش عارفة هما عملوا ايه في روزاليوسف مثلا، لكن لما يكتشفوا رد بلال فضل و يقول أنا بتشتم في روزاليوسف و يروحوا روزاليوسف و يلاقوا عمرو سليم بيرسم هناك هيقولوا ايه دا في ايه!؟؟ ما هو في قراء عاديين سمعوا عن الدستور ..جريدة بتشتم في الريس أنا هروح أشتريها فلاقوا في تناقض معين..بلال فضل مطلوب للمحاسبة الاخلاقية...المستشارة نهي الزيني كتب فيها ما كتب,,أثناء أحداث القضاه استـُكتب من القضاه التابعين للحكومة ناس كتبوا فى اتجاه مضاد تماما لما عليه معظم الوطنيين أو حتي المحايدين او شوف موقف الاستاذ مصطفي بكري !!!؟

عمرو سليم:
ماهو بص مبدئيا مش هعرف أدافع عن الحاجات اللي انت قلتها كلها و في نفس الوقت أنا في حاجات كتير جوا الجورنال أنا مش موافق عليها زي مافي حاجات كتير عجباني برضو الجورنال..بس أنا برضو في النهاية مسؤول عن مساحتي بس،يعني أنا مثلا أما بلال اتهاجم في روزا كان ردهم طب مانتوا بتشتمونا في الدستور..انت دلوقتي ثاير و متضايق ان بلال اتشتم عندنا،ماحنا اتشتمنا عندكوا يعني كل أسبوع بلال بيشتمنا عندكوا..انت جاي دلوقتي تقول مش عايز أشتغل مانتا ليه سكتتلهم و همه بيشتمونا، و همه ممكن يكون عندهم شئ من الحق لأن دا بيتي أساسا، فده المأزق اللي أنا كنت فيه،أنا أروح مثلا الدستور ألاقي ابراهيم بيشتم في روزا..تروح روزا تلاقي برضو نفس الشئ..أنا في النهاية مساحتي اللي هنا و هنا مابتناقضش بعضها,,أنا مابقولش في روزا عاش حسني مبارك و مابقولش في الدستور يسقط حسني مبارك..أنا في الاتنين ضد،بس الفرق ان في الدستور كنت أقدر أهاجم مبارك لكن في روزا كل اللي أقدر أهاجمه الحكومة أهاجم سياساتها أهاجم نظيف لكن طبعا هتلاقي فيها مبارك وفي اي مطبوعة حتي في الأسبوع هتلاقي فيها مبارك

المحروسة:
مابتكتبش سياسة ليه في روزا اليوسف؟

عمرو سليم:
لو قالولي أكتب هكتب

المحروسة:
لازم يقولوا لك اكتب؟

عمرو سليم:
ماهي دي مشكلتي...ماروحش مكان الا لو طلبوا مني ،مطلبش اني أنا أكتب الا لو حد قاللي عايزينك تكتب

المحروسة:
انت بتكتب في روزاليوسف عمود اسبوعي مع الاستاذة أمينة خيري

عمرو سليم:
انت متابع

المحروسة:
اه وحضرتك أمينة خيري و عمالين تردوا علي بعض

عمرو سليم:
بس هي بتكتب كويس أوي

المحروسة:
من زمان و انا متابع الصفحة بتاعة يوم الخميس

عمرو سليم:
بتلاقي فيها سياسة و لا لأ؟؟

المحروسة:
بشكل مباشر لا ..النهاردة حتي الأستاذة أمينة كاتبة تعالوا بقي نطلع برة السياسة ونرجع تاني لموضوع الستات و الرجالة

عمرو سليم:
احنا الأول بداية فكرة العمودين دي فكرتي أنا ، كان عبد الله كمال قاللي تقترح ايه قلت لهط خط الستات قاللي كويس قلت له أقترح ان نقاسم فيه حد يعني يبقي في ست و راجل بيخبطوا ف بعض عشان يبقي تجربة جديدة,,قاللي طب مانتا اللي ترد قولتله اشمعني قالي يعني مانتا بكتب و وافقت.فعجبتني العملية دي شايفها انها غض النظر عن انها جديدة شايفها تجربة ظريفة و شايف ان الجورنال لو كان عمره أطول شوية كان ممكن يبقي صداها كويس

المحروسة:
و لو كانت في غير روزا اليوسف كان هيبقي صداها أكتر

عمرو سليم:
كان هيبقي صداها أعلى طبعا بس برضو أنا بحب روزاليوسف، يعني ينفع حازم امام يسيب الزمالك؟

المحروسة:
مابلاش سيرة حازم

عمرو سليم:
أنا اتولدت أبويا كان في الجمهورية و بعدين حصل مدبحة الصحفيين اللي هي أيام عبد الناصر...مشي من الجمهورية راح روزاليوسف من ساعتها و انا أعرف ان والدي في روزاليوسف يعني من وانا عندي ست سنين مثلا و مجلة روزاليوسف و صباح الخير بتجيلنا كل أسبوع في البيت..يعني عيني اتفتحت على كل رسامين الكاريكاتير اللي في المجلتين دول و الأيام مشيت وجريت فانا غصب عني بحب المكان دا و بعدين انت لو جربت روزاليوسف ليها غرام غريب جدا..يعني اللي يدخلها مايسيبهاش أبدا ما يزهقش منها أبدا,,ابراهيم سابها دا موضوع تاني

المحروسة:
بلال فضل سابها

عمرو سليم:
لا بلال مكنش متعين بلال كان بيتمرن فيها و بلال صحفي كويس من يومه و بالتالي أما ابراهيم عمل الدستور الاصدار الأول خده معاه سكرتير التحرير من روزا فساب روزا

المحروسة:
كان عنده 23 سنة وقتها

عمرو سليم:
اه كان لسة صغير، هى روزا بيت..و بعدين الناس دول ماضيقونيش في حاجة يعني أنا بعمل كل اللي أنا عايزه ...أشتمهم ليه؟

المحروسة:
تقييمك لتجربة صوت الأمة

عمرو سليم:
هو ابراهيم عيسي صحفي شاطر طبعا و موهوب و أكتر صحفيين جيله موهبة بالتالي صوت الأمة ناجحة برضو بولاد روزاليوسف يعني ناجحة بوائل الابراشي و ابراهيم عيسي و لو تعرف ان ابراهيم منصور برضو روزاليوسف، وليد طاهررسام في صباح الخير برضو روزاليوسف اللي هو برضو في الدستور..هاني شمس أساساروزاليوسف،حمدي رزق اللي في المصور روزاليوسف، دول لعيبة الاسماعيلي اللي الأهلي و الزمالك بيشتريهم بعد كدة

المحروسة:
تجربة صوت الأمة اللي سألتك عليها لأن فيها توازن بين قوة التحقيق اللي بيمثلها وائل الابراشي و بين رئاسة التحرير ايضا لابراهيم عيسي.. بتشوف ان هي أقوي في مادتها من الدستور؟

عمرو سليم:
لا أنا شايف ان الدستور أقوي جورنال طبعا ،و شايف ان ابراهيم لوعنده قدرفي الايام الجايه من التواضع و الكياسة و حب الجورنال والصحفيين اللي فيه أكتر شوية هيحافظ علي التجربة دي، الدستور دي احنا عملناها و طلعت علي اكتافنا فلازم تظل حتي لو مشي منها عمرو سليم حتي لو مشي من خالد البلشي..لازم تظل لان في ناس ءامنوا بالتجربة دي، خطأ جدا اللي بيحصل و خطأ جدا علي المعارضة في مصر كمان ان تجربة تبقي كويسة و ناس مصدقاها يحصل فيها كده ، يعني لازم تظل كويسة ، أنا هظل دايما معتز بتجربتي مع الدستور طبعا و هظل معتز بمقالاتي اللي أنا كنت بكتبها هناك

المحروسة:
كنت متأثر و انت خارج من الدستور بعد ماقطعت الورق؟

عمرو سليم:
اه طبعا.. أنا اتأثرت بحاجتين : أول حاجة موقف ابراهيم عيسي وان دي تبقي الطريقة اني أسيب الدستور لأن أنا حسيت و انا ماشي ان كأنك اتعملك فخ و انت وقعت فيه ، كأنك متخطط انه هيقف هنا فنخبطه بالطوبة فهو هيتضايق و هيمشي و مش هيلعب فانت استناه هنا و اضربه بالطوبة فهتيجي دي هيمشي و مش هيلعب بالضبط

المحروسة:
زعلت من بلال فضل؟

عمرو سليم:
لا مزعلتش منه..لا بلال أنا مرغموش علي تصرف.. حرام..بص أنا من زمان خدت عهد علي نفسي اني مزايدش علي حد لأن ماحدش عارف ظروف الناس أبدا...بلال أساسا بدايته الحقيقية في الصحافة مش في روزا..بدايته في مع ابراهيم في الدستور أما خده في الاصدار الأول

و بلال قبل قلمين كان هو سيناريست بس ، جه عمل قلمين اللي مصر كلها اتكلمت عنها,, بلال لما هاجمته روزا دافع عنه ابراهيم عيسي ،مينفعش بعد دا كله أقوله سيب الدستور.. لأ..يبقي هو قليل الأصل لو ساب الدستور عشان عمرو سليم..لأ..ابراهيم طبعا معاه من الأول و سانده

المحروسة:
مش بكلمك عن انه يسيب الدستور، علي طريقة تضامنه معاك أو تقبله أو دفاعه عنك

عمرو سليم :
لا أنا مش منتظر تضامن خالص و الله...التضامن معايا مع نفسي،أنا عملت حاجة باللي يمليه عليه ضميري و لو اتكرر دا الموقف مليون مرة بيتهيألي مش هيختلف رد فعلي لأن أنا كدة طول عمري و حتي عارفيني هنا في روزا من زمان يعني حتي معروف عني في الأسبوع ، للأسف يعني أنا كدة،بلال ماطلبش منه يتضامن معايا و خطر برضو انه يسيب قلمين يعني يرضيك الناس يبقي على النت الكلام دا و الناس كلها تشوف خالد البلشي مشي و عمرو سليم مشي و بلال فضل مشي و و بتوع الكاريكاتور كمان يمشوا

المحروسة:
انت شايف الدستور هيستمر؟؟

عمرو سليم:
أنا أتمنى انها تستمر يعني أتمتي ابراهيم يهدي شوية ، أتمني الصحفيين يرجعوا يشتغلوا بسعادة و يحسوا بفخر و هما بيشتغلوا في الدستور،أتمني يبقي في رئيس تحقيقات بحق و حقيقي ..و الله بجد يعني حد في قوة خالد البالشي كده، أتمني حد في نظافته و في قوته

المحروسة:
انما حد ميكونش بيتعامل مع جهات خارجية

عمرو سليم:
مع أمريكا مثلا؟؟ لأ ... قصدك أحمد فكري يعني عشان راح حفلة السفارة الامريكية

المحروسة:
اه بتهيألي كده

عمرو سليم:
يعني أحمد فكري لسة صحفي صغير ماسمعتش اسمه كتيرو ربنا يعينه علي المهمة اللي هي أكبر منه بكتير

المحروسة:
طيب اخر حاجة عندنا،احنا أرهقناك جدا و الله

عمرو سليم:
لا لا أنا انبسطت بيك جدا و الله و أسئلتك كلها ممتازة

المحروسة:
احنا عندنا فقرة حضرتك هتوجه رسايل للأسماء اللي أنا هقولها دي
أولا: رسالة لعبد الله كمال

عمرو سليم:
رسالة لعبد الله كمال .. اسم روز اليوسف يحتم عليه ان توزيع الجورنال لازم يوصل اقل حاجة علي السنة الجاية نكون مسمعين أوي و توزيعنا يوصل علي الاقل لخمسين ألف

المحروسة :
الأستاذ مجدي الجلاد

عمرو سليم:
الأستاذ مجدي الجلاد صحفي شاطر جدا و رئيس تحرير صديق عزيزو بشد علي يده بقوة و بقوله ان هو عامل تجربة غير مسبوقة في الصحافة المصرية لأن هو أول صحيفة بعتبرها قدرت تملأ الفراغ اللي كان موجود بين الصحف القومية و الصحف الحزبية أول صحيفة ممكن تقول بتقول الحق فعلا و بصدق

المحروسة:
ممتاز القط

عمرو سليم:
أنا كل اللي أتمناه ان طشة الملوخية تكون أحسن شوية السنة الجاية

المحروسة:
الاستاذ عبد الله السناوي

عمرو سليم:
مش عارف .. أنا بس هو في مشكلة في حاجة يعني أنا و كل اللي في العربي أصدقاء عزاز جدا عليه و زملاء عمل و اشتغلت معاهم فترة طويلة بس أنا عايزة أفهم ازاي جريدة طالعة أساسا بتدافع عن حقوق العمال و هي مبتديش الصحفيين مرتباتها يعني لو أنا عايز أسأله هو ازاي مرتبه ثابت و مستمر و صحفيين مالهمش فلوس!؟ أنا أسمع عن صحفيين مابيقبضوش خالص,, يعني ازاي أنا أعد أكتب و أنا عارف اني مش هجيب لبس مدرسة لابني،مش هعرف أدخل علي مراتي بالعشا،ازاي!؟ بأمارة ايه يعني ! مش دا اللي بيحصل؟؟ أنا فاكر هحكيلك قصة في الموضوع دا حضرتني دلوقتي أنا كنت في الأردن كانوا بيسجلوا معانا برنامج و تصادف ان معايا الفنان محيي و كان معانا رسامين عراقيين وقت الحرب العراقية الايرانية،فقال لهم أنا دلوقتي بعمل ماكيت جديد لجريدة السفير و عايزكم ترسموا فيهاو عندكم عمرو سليم هيقوللكوا ازاي في تضييق صحف المعارضة في مصر وانتم كلكم حاجزين لكل واحد مساحة باسمه، كان فنانين كبار.. عبد الرحيم ياسر /وائل نعمه الله يرحمه وواحد اسمه خضر ، فواحد فيهم قال له تضمن لنا ان مفيش كلمة واحدة هتنزل ضد صدام؟ قالوله نضمن لكم ان الصحيفة تبقي صحيفة قومية عروبية مؤكد مع العراق لكن مضمنش ان المقال ينزل كدة أو كدة ضد صدام حسين مضمنش...قالوا له احنا لو كلمة واحدة نزلت ضد صدام حسين هنضيع هنتقتل، وقعدوا يحكوا عن واحد هو و مراته قعد في ملجأ و الملجأ دا واصل لحد ركابهم ميه لدرجة ان بعد تلات ايام جالها روماتيزم و لحد الوقتي مبتتحركش ،وصلوا في النهاية ان النضال الحقيقي ان يبقي بيتك وعيالك في أمان و تقدر تأكلهم و تلبسهم ... دا النضال الحقيقي قالوا له غير كده النضال التاني احنا مانعرفوش دلوقتي، فانا مش فاهم فعلاازاي نضال و بيتك يبقي جعان .. يافرحتك بصورتك اللي بتنزل دي و عمودك اللي بينزل و انت مبتاخدش مليم من العربي ...لازم يتحل طبعا الموضوع دا فورا...لازم يتشاف أي حل

المحروسة:
رسالة لأنور الهواري

عمرو سليم:
أنور الهواري أنا بحترمه من أيام المصري اليوم ...رئيس تحرير هايل و صحفي جرئ و من ساعة ما جه الوفد و الوفد اتغير فعلا بقى أكتر قوة بقي أكثر جسارة بقي واضح ، حتي اتغير الماكيت نفسه بتاع,, العناوين بقت أفضل .. الصورة خدت مساحتها كويسة انور الهواري صحفي كبير طبعا

المحروسة:
رسالة للأستاذ عصام فهمي

عمرو سليم:
الوحيد اللي اتصل بيه بعد أزمة الدستور، و قاللي أنا أول مرة أكلمك و لو في مشاكل من الدستور احنا منسيبش البيت احنا في بيت واحد و تعالي نعد و انا مسافر قلتله أول ماحضرتك ترجع كلمني...فكلمني نتقابل امتي فقلت له اتصل بي بعد ساعة و قال هتصل بيك بعد ساعة المهم أنا ماتصلتش و هو ماتصلش و عدي الموضوع لكن بالأمانة و أنا موجود ماحصلش أي مشاكل

المحروسة:
رسالة للأستاذ بلال فضل

عمرو سليم:
انا أولا بهنيه علي الأفلام بتاعته و بهنيه بالذات على القضية اللي هيرفعها علي عباس أبو الحسن

المحروسة:
بس؟

عمرو سليم:
اه بس

المحروسة:
مش عايز تقول له حاجة تاني؟

عمرو سليم:
لا لأ... بسلم عليه

المحروسة:
طيب خلاص

عمرو سليم:
اه أنا عايز أقول لبلال حاجة برضو.. ان أنا و بلال أما اجي ابص في النهاية مثلا أما الواحد يعني ربنا يفتكره هتظل دايما تجربة الدستور من أنصع التجارب في حياتي و بالذات قلمين..قلمين أنا حاسس ان أنا و بلال كنا بنعمل فيها خلطة حلوة فعلا ، دي في رأيي حاجة مهمة أوي..من الحاجات الجميلة اللي أنا كنت بقراها لبلال

المحروسة:
رسالة لجمال مبارك

عمرو سليم:
الواد قلبه بيوجعه و عايز حد يدلعه

المحروسة:
انت رسمتها كاركاتير

عمرو سليم:
اه

المحروسة:
و مين هيدلعه

عمرو سليم:
مش عارف بقي أنا بيتهيألي هو هيفهم الرسالة دي ، أصل بيهيألي بيني و بينه سيم

المحروسة:
رسالة للدكتور أحمد فتحي سرور

عمرو سليم:
انت جايبلي أسامي لا أحب أقرب منهم و لا أحبهم يقربوا مني ان جيت للحق يعني و الله أنا شايف ان كلهم بارعين في التمثيل و بعدين بالذات في ناس بتشوفهم و هما قاعدين و سابونا زيعرايس الماريونيت بالظبط ، يعني أنا متخيل لو شفت أحمد فتحي سرور ده ماشي ماشي في الشارع هشوفه بالمنصه بتاعته لأني عمري ماشفته الا بالمنصة ، و مش عارف لو المنصة اتشالت ممكن بقية جسمه يتشال معاها ،المشكلة اني بحس دول كلهم عرايس ،و بمناسبة روزاليوسف كان في حاجة رسمتها عن قانون منع النشراللي أعضاء مجلس الشعب وافقوا علي عليه و قالوا موافقون و فجأة جه مبارك و قالك شيل قانون منع النشر فبرضو كلهم قالوا موافقون ... فانا عملتها كدة...و هم كلهم في النهاية مافيش أي مواقف خالص فبالتالي مش شايف أي أدوار..أنا شايف دور واحد بس دور رئيس جمهورية رئيس دولة
وهقوللك على كاريكاتيرة عملتها و نزلت في روزا اليوسف...واحد بيقول التاني أنا هادخل دورة المية لما ييجوا يصوتوا ابقي ارفع ايدي و قول موافقون، أصل أنا مش شايف لهم أي لازمة خالص و شايف انها تمثيليات بتتلعب و بس و شايف ان التمثيلية غرضها انهم يمرروا لنا حاجة، الخطب و جلسات مجلس الشعب شايف ان دي كلها لا ليها أي علاقة بالديموقراطية و لا خلافه ، دي حاجات لمجرد استهلاك دماغ الأنسان المصري و بس و استهلاكه في حاجات عبيطة ،بتفكرني جلسات مجلس الشعب دايما بالأفلام العربي ان دايما لازم تنتهي بالبطل بيبوس البطلة و كل الناس بخير ووئام،يعني يتعرض عليه القانون و دا يرفض و دا يقبل و دا يزعق و دا ايه و دا لأ و دا اه و في الاخر موافقون هي بالضبط كده و دا الأسطي بتاع الموضوع دا,, هو دور بيلعبه و هو لو مشي و جه غيره...هو نفس الدور

المحروسة:
رسالة لابراهيم عيسي

عمرو سليم:
لا.. ابراهيم عيسي صاحبي و حبيبي و أشهر رئيس تحرير في مصر و كل اللي برجوه منه بس شيء من التروي و قدر من التواضع عشان الدستور يستمر و الدستور ياابراهيم بتعمل الناس و الناس بيعملوها مش هي اللي بتعمل و بس، و الصحفيين مابيجوبوش من عل الارصفة الصحفيين لو مش صحفيين ماكانوش كتبوا أساسا في الدستور، وصغار الصحفيين دول همااللي عملوا الدستور زي الدستور عملتهم,,,كل اللي بطلبه من ابراهيم انه يحافظ علي تجربة الدستور

المحروسة:
لو رسالة للرئيس عبد الناصر ..تقول له ايه؟

عمرو سليم:
الرئيس عبد الناصر أنا بحبه حب غريب جدا لكذا سبب أسباب أنا ليا دخل فيها و أسباب مليش دخل فيها بس زي ما انا بتمني ان هو يرجع و يحكمنا و بقول ياريتني كنت ف أيام حكمه عايش زي مانا أخشي ان أن أعيش أيام حكمه و ارسم الكاريكاتيرت دي عليه زي ما رسمتها لمبارك بس ساعتها هيكون حبل المشنقة مستنيني، ففيه تناقض بيني و بين عبد الناصر في الموضوع دا ، لكن المؤكد أحلم بزعيم قوي طبعا و عارف ان دور مصر تقدم بعد وفاة عبد الناصر و اتمني زعيم يعيد للمصريين كرامتهم بس المشكلة لو جه عبد الناصر تاني مش هقدر أرسم أي كاريكاتير خالص,,ممكن أكون في المعتقل....الطريف بقي في الموضوع ان الثورة انتصرت علي الملكية؟؟ ازاي..!؟أنا أمي اتسمت علي اسم أخت الملك فاروق ، و أبويه لما اتولد و قامت الثورة أصبح اسمه على اسم زعيم ثورة 23 يوليو..في النهاية هما اللي اتنين اتجوزوا...عملية غريبة أوي..مش كدة؟؟و بعدين يشاء القدر اني أنا أسكن في شارع اسمه ناصر الثورة، و أتجوز فتطلع مراتي عيد ميلادها يوم 25\7 يعني بعد الثورة بيومين فالعملية غريبة جدا..وبس هو التناقض بتاع موضوع عبد الناصر لو جه أنا متأكد اني مش هرسم كاريكاتير

المحروسة:
رسالة لمحمد مهدي عاكف المرشد العام للأخوان

عمرو سليم:
ان جيت للحق و لو ان كلامي ممكن يضايق ناس لأن أنا عارف أكيد فيه اخوان كتير على النت ومنتشرين جدا و انا أبدي اعجابي بتحركاتهم بس بالأمانة متمناش أي حد من الاخوان يحكم مصر..أنا شايف ان مصر أكبر أوي أوي من ان يحكمها مبارك أو يحكمها الاخوان ، و شايف ان مؤكد في بديل أفضل جدا من الأخوان و أفضل من مبارك و شايف ان احنا منستحقش ان يحكمنا الاخوان أبدا,,مهدي عاكف أو غيره

المحروسة:
الرسالة ايه بقى ؟

عمرو سليم:
الرسالة انه ممكن يحكم ماليزيا لكن صعب أوي يحكم مصر

المحروسة:
كلمة لمجموعة المحروسة البريدية

عمرو سليم:
بصراحة أنا مبسوط جدا اني عملت الحوار دا و اللي بسطني أكتر يعني أكتر حاجة بتضايقني ان جيت للحق في الحوارات انك ممكن تحس انك قاعد قصاد ناس مش قارية مش عارفة ايه اللي بيحصل.....أنا فوجئت انكم عارفين كل شئ...قاريين الجرايد كلها ....متابعين ..فاهمين...دهشتي انكم مش شغالين في الصحافة و دا الشئ الغريب جدا...أنا أكتر حاجة بتبسطني في مجموعة المحروسة اتجاهاتها متعددة وده ضمان استمرارية ، و نصيحتي انكم تحافظوا علي المجموعة دي كدة زي ماهي مستقلة لانكم طالعين أساسا عشان مصلحة البلد مش عشان فصيل معين و أتمنى لكم التوفيق

المحروسة:
الفنان عمرو سليم بنشكر حضرتك علي سعة صدرك و علي الحوار الممتع معاك و شاكرين ليك جدا جدا لتشريفنا في ضيف و حوار علي المحروسة

عمرو سليم:
الله يخليك أنا متشكر أوي

الهيكل الإداري لجريدة الدستور

2006-08-18T18:36:00.000-07:00

عدنا!!

2006-08-18T18:30:00.000-07:00

التعليق رجع يا شباب بعد ما المدونة نضفت من وساخات الدستور ممكن تعلقوا براحتكم و هنبدأ تاني الموضوعات الساخنة و البداية هتكون رد علي شوية أسئلة زي علاقة الإخوان بالدستور ؟ و علاقة إبراهيم عيسي بناس تانية كتير ؟ و نوعدكم اننا ننشر بروفيلات لرجالات الدستور بالترتيب اللي تحددوه علقوا بالاسماء اللي عاوزينها عشان هنختار كل يوم واحد نكتب عنه و ماتخافوش الفضايح كتير قوي

لقد تم وقف التعليقات

2006-08-12T08:25:00.000-07:00

نعتذر عن وقف التعليقات لأن رجالات الدستور أستخدموا أساليب أمنية في التعامل مع مدونتنا حيث قاموا بوضع كتب كاملة كتعليقات لمحو ماهية التعليقات و لكننا نؤكد أننا لا نحتاج للتعليقات لأننا نعلم أن الجميع بالفعل يقف بجانبنا و هو ما سنعرضه في وقت قريب جداً و بمستندات , و نؤكد أننا مازلنا نحتاجكم جميعاً يا من تقرءون مدونتنا و لتقفوا معنا بقلوبكم لأنهم يريدوا أن يعزلونا عن العالم لذلك كونوا معنا.

قرارات إبراهيم عيسي

2006-08-12T08:18:00.000-07:00

هذه صورة من قرارات الأستاذ إبراهيم عيسي و التي تضمنت التحقيق مع بعض المحررين و تحمل المعينيين منهم قيمة أموال التأمينات التي من المفترض أن تتحملها الجريدة و ليس المحررين, و سنواليكم بالمزيد من القرارات قريباً

نيهال عصام إسماعيل فهمي و عصام إسماعيل فهمي و إبراهيم عيسي

2006-08-08T09:58:00.000-07:00

الكثير لا يعرف حقيقة ما حدث في أزمة عصام إسماعيل فهمي مع نقابة الصحفيين و التي أشرك فيها جريدتي الدستور و صوت الأمة بدون أي سبب , و لذلك سنشرح لكم القصة كاملة

القصة تبدأ عندما قرر عصام بيه إسماعيل فهمي إنه يدخل بنته نقابة الصحفيين بالرغم إنها مش صحفيه و مالهاش في الصحافة و لكن عصام كان طمعان في الكام ملطوش اللي النفابة بتديهم لأعضائها و مع اول لجنة للنقابة أقحم عصلم بيه فهمي نيهال بنته مع الصحفيين في صوت الأمة و لكن إبراهيم حجازي رئيس اللجنة رفض دخولها النقابة لأنه عندما سألها عن صفتها قال بالحرف الواحد" أنا بأشتغل في الإدارة" و قام عصام فهمي بمساعدة إبراهيم عيسي بإرسال طرد كبير لإبراهيم حجازي فيه ملفات لتجاوزاته داخل الأهرام و تهديد بنشر هذه التجاوزات علي صفحات الدستور في حال عدم دخول بنته النقابة فقام إبراهيم حجازي بإرسال الطرد مرة أخري و معه كارنية النقابة بالرغم أن يحيي قلاش و جمال فهمي لم يوقعوا عليه و عندمل علم جمال فهمي بما حدث أستطاع بلعبة صغيرة الحصول علي الكارنية و قام بتمزيقه و لم الموضوع و لكنه فؤجي بإتصال من إبراهيم عيسي يقول له " يعني هي جت علي البت دي يا جمال مل تدخلها و خلاص " فرد عليه جمال فهمي بعصبيه شديدة " هو أنا كنت دخلت حد مش من حقه يخش قبل كده عيب قوي يا إبراهيم اللي أنت بتقوله ده"

وتم بعدها رفع مقال جمال فهمي من علي صفحات جريدة الدستور

وقام عصام فهمي بمقاطعه النقابة و قطع أموال عن محررين كانوا يستعدوا لدخول النقابة لأن المحروسة بنته لم تدخل النقابة

و سنواليكم بالتفاصيل الجدية قريباً و ليعلم الجميع أن التصعيد لم يحدث بعد و أننا نعلم ما نفعل و مازال لدينا الكثير لنقوله و الكثير و الكثير لنفعله

عقود وهمية

2006-08-08T09:52:00.000-07:00

أخيراً حصل محرري الدستور علي عقودهم بعد لعبه العقود الوهمية التي لعبها إبراهيم عيسي و عصام إسماعيل فهمي و و لكن العقود التي حصل عليها المحررين عقود مؤرخة بتاريخ مستقبلي وهو أول شهر سبتمبر تخيلوا !!

فعل عصام و إبراهيم هذه اللعبة حتي يجبروا محرري الدستور علي البقاء في المكان و الرضاء بالفتات من الأموال و إغلاق أفواههم حتي يمر 6 أشهر علي تاريخ الأول من سبتمبر لأن الجريدة من حقها إلغاء الحقوق في خلال 6 أشهر من تاريخ بدء العقد علي الرغم أن المحررين قد وقعوا علي العقود منذ أشهر مضت و لكنهم لم يحصلوا عليها و ما نراه الأن يحدث في الدستور هو إستكمال للأساليب القمعية التي يتعامل بها إبراهيم عيسي و عصام إسماعيل فهمي

المعركة مستمرة

2006-08-08T09:35:00.000-07:00

هل يعتقد إبراهيم عيسي أن ما يفعله من ضغط علي المحررين هيجيب نتيجة ؟ أعتقد أه فإبراهيم عيسي مازال يستعمل نفس أسلوب الحكومة التي تضغط علي الشعب بكل قوة حتي تكون مطالبهم قليلة .

إبراهيم عيسي أعطي كل محرر معيين في الدستور 65 جنية تخيلوا , بيعمل كده عشان المحررين يزهوا و ينضغطوا علي الأخر تماماً كما فعلت الحكومة التي ترفع تذاكر المترو و لا تستحي و ترفع أيضاً سعر البنزين , إبراهيم عيسي قمعي تماماً مثل الحكومة التي يكتب عنها إبراهيم عيسي لا يهمه سوي أن يحصل في آخر الشهر علي 26 ألف جنية من عصام إسماعيل فهمي و ليذهب شوية المحررين العيال إلي الجحيم .

نحن لن نتوقف و سنطالب بحقوقنا في كل لحظة حتي لو كلفنا ذلك أي تضحية لأن التفريط في الحق تماماً كالتفريط في العرض و هو ما لن يقدر إبراهيم عيسي علي إجبارنا عليه مهما ضغط و خصم و قمع و قمع و قمع .

سنبقي نطالب بحقوقنا حتي نحصل عليها كاملة و بدون أي إستثناء من أول أستاذ خالد البلشي حتي أصغر محرر تم خصم و إستقطاع مرتبه .

و نعلمكم أن خطواتنا القادمة لن تكون علي الإنترنت فقط و ستكون علنية و بكل حدة تماماً كما فعلتم أنتم يا رجال الدستور الكبار و موعدنا قريب .

شريط أخبار الدستور

2006-08-08T09:20:00.000-07:00

قرر إبراهيم عيسي رئيس تحرير جريدة الدستور خصم 50 جنية من كل محرر في حالة تغيبه عن حضور إجتماع قسم التحقيقات برئاسة أحمد فكري.

أول مرة منذ دخول الألفية الجديدة يستعد محرري الدستور المعينيين مرتباتهم الشهرية و التي وصلت إلي 65 جنية لكل محرر بعد خصم 135 جنية من كل محرر لدفعها للتأمينات الإجتماعية بالرغم أن هذه الأموال تدفع عن طريق الجريدة و ليس المحررين أنفسهم , شوفوا أنتو بقي لما محرر يقبض 65 جنية في الشهر

قررت إدارة جريدة الدستورأن كل محرر معيين من اللي كتبنا عنهم و الذين لم يحصلوا علي عقودهم سيحصلوا علي عقودهم و بالفعل حصل المحررين علي عقودهم و لكنهم وجدوا أن العقود مؤرخرة بتاريخ 1\9\2006 بما يعني أن الجريدة تستطيع إلغاء هذه العقود حتي يوم 1\3\2007 ز أن المحررين لن يتم التأمين عليهم سوي بعد هذا التاريخ

هل نحن أمن ؟

2006-08-05T03:42:00.000-07:00

بعد ظهور هذه المدونة بلحظات بدء بعض الناس يروجوا أن هذه المدونة أمنية – أي من صنع رجال الأمن – حتي يغلقوا جريدة الدستور المعارضة القوية التي تقف في وجه الجميع دون أي خوف , و لذلك قررنا أن نشرح لكم الحقيقة كاملة و لتعرفوا من هم الشرفاء و من هم رجال الأمن الحقيقيين .
السبب الأول لتلك الأقاويل هو كما يقول البعض أن الهدف من كل ما نفعل هدم جريدة الدستور بشكل مختلف حتي لا يضطر الأمن إلي إغلاق الجريدة بشكل متعسف كما فعل قبل ذلك , و إليكم كل ما نؤكد به أننا مش أمن و أن ما نفعله هو الحصول علي أدني حقوقنا:

أولاً: كل ما ننشره من وقائع حقيقية في الجريدة الهدف منها هي إفاقه رجال الدستور الكبار لما لم يروه و لم يتخيلوا أنه ذو أهمية , أردنا فقط أن نكون جرس إنذار حتي لا تنهار جريدتنا التي بدءنا فيها أول طريقنا في الصحافة و ندين لكل فرد فيها بكل ما حققناه من شهرة أو خبرة. نريد فقط أن يعلم رجال الدستور أن ممارساتهم هي التي ستغلق الجريدة بل و ستنحدر بها لتصبح جريدة صفراء لا معني لها و ذلك هو كل أمل الجهات الأمنية في مصر و كل أمل ناهبي البلد و أكلي حقوق مواطنيها التي كانت الدستور تكتب عنهم و لكن الأن أصبحت الدستور جزء منهم ,
ثانياً: نحن نفعل بالضبط ما يقوله إبراهيم عيسي في مقالاته لأننا وجدنا أنفسنا نكتب عن عمال مصر و مشاكلهم و نطالبهم بالنهوض أو كما قال الأستاذ إبراهيم عيسي " يا عمال مصر أتحدوا أو وحدوه" و نجد أننا لا نفعل حرفاً واحداً مما نكتب و أن كل حقوقنا في المكان قد أهدرت و أن ما نفعله الأن هو بالضبط ما قاله إبراهيم عيسي في مقالاته ,و بالتالي فإننا حتي الأن و طبقاً لما نكتب و طبقاً لما كتب رئيس تحريرنا الأستاذ إبراهيم عيسي مازلنا تحت طوعه بل أنا ننفذ كلامه -الذي قرأتوه- بالحرف الواحد و ليكن لكم في مقالات إبراهيم عيسي خير دليل علي صدق ما نفعل .

ثالثاً : هل يري أي منكم أن ما نطالب به هو شيء over أو رفاهية غير مبرره ؟ أعتقد أن كل ما نطلب به هو كامل حقوقنا بل حتي الأن لم نطالب بكل حقوقنا , طب قد يكون طريقة عرضنا للمشكلة هي طريقة سخيفة لأننا نفضح الدستور علي الملأ و كان الواجب أن نفعل ذلك داخل جريدتنا و أن لا تخرج مشاكلنا خارج بيتنا, و لكن هل يعتقد أي شخص أننا لم نلجأ لمئات المحاولات للحصول علي حقوقنا ؟ لقد تكلمنا مع كل مسئول في المكان من أول عماد بتاع البوفية حتي عصام إسماعيل فهمي رئيس مجلس الإدارة و ناشدنا و طلبنا و توسلنا و فعل ما قد يعتبر إهانة لكرامتنا حتي نحصل علي حقوقنا حتي نحصل علي أدني حقوقنا, حتي وصل الأمر إلي رفض الأستاذ إبراهيم عيسي مقابلتنا و قالها بالحرف الواحد" ياريت ما تتجمعوش كده و تطلعوا كل شوية عندي في المكتب"
رابعاً : ماذا سيحدث لو فعل الأستاذ إبراهيم عيسي كل ما نطلبه هل ستغلق الجريدة ؟ هل ستنهار؟ أعتقد لا بل أنا متأكد أن حصولنا علي حقوقنا سيرفع من شأن الجريدة و سيرفع من شأن رئيس تحريرها و رئيس مجلس إدارتها و كل المسئولين فيها., و لكن الحقيقة أن كل ما نطلبه لن يتحقق لان المسئوليين لا يروا أي أهمية لنا و يعتبرون مطالبنا " دلع عيال" , لذلك نحن لسنا أمن بل من يدمر الشباب الصغير , بل من يحبط أمالهم , بل من يعايرهم , هم جميعاً ........

حقوق المحررين المهدرة

2006-08-04T06:56:00.000-07:00

لا يمكن أبداً أن ننكر أن الدستور أعطت فرصة كبيرة لشباب صغير ليصعدوا في عالم الصحافة و لكن أيضاً لايمكن إغفال أن ما حققوه تم بمجهودهم الشخصي و أن فتح المجال لنشر مجهود الشباب لا يعني أبداً أكل حقوقهم بأي شكل لأن الدستور كما أضافت للمحررين الشباب فإن المحررين الشباب قد أضافوا للدستور بشكل أو بآخرلكن الاستاذ ابراهيم عيسى كان لا يترك فرصة الا وعاير الشباب بان الدستور هو الذى يصنع المحررين والمحررين لا يصنعون الدستور كما كان يقول انا لميتهم من على الأرصفة وهأرجعهم على الأرصفة تانى .و سنبدأ من الأن في عرض كل ما تعرض له محرري الدستور الشباب من مشاكل بشكل محايد جداًَ قدر المستطاع و أتمني من رجال الدستور الكبار أن يعلقوا علي كلامنا و أن يفندوا آرائنا إذا أستطاعوا. البداية ستكون مع مرتبات المحررين , حيث يتم التعامل مع محرري الدستورالمعينين بالقطعة بما يعني أن المحاسبة تتم حسب كشف الإنتاج الشهري و وضعت إدارة الدستور تسعيره للموضوعات بشكل غير رسمي هي 50 جنية للموضوع ,و بغض النظر عن هذا الرقم الهزيل جداً إلا أنه حتي هذا الرقم لا يحصل عليه المحررين بشكل كامل , حيث يتم خصم مبالغ تتراوح ما بين ال50 جنية و ال400 جنية من المكافأت الشهرية للمحررين دون أدني سبب و تفسير فقد يكون كشف إنتاجك يؤكد إنك عامل 16 موضوع وهو ما حدث فعليا تجد أنك تحصل علي 400 جنية فقط في آخر الشهر مما يعني خصم 400 جنية منك دون أدني تفسير ورغم انك تكون قد قدمت اكثر من ضعف هذا العدد من الموضوعات وفى ظل هذا الوضع لم تكن المرتبات تتجاوز من 200 الى 300 جنيه وكان الحلم ان نحصل على 500جنية بأي حال من الأحوال , و كان العديد من المحريين تحت التدريب كانوا يحصلوا علي 50 جنية في الشهر و مع ذلك كانت إدارة الجريدة تحملهم فلوس الإتصالات. لاحظ أننا نتحدث عن شباب صغير يركب مواصلات ويبقى فى المكان ساعات طويلة ومعظمهم مغتربين و يريدون إثبات نفسهم و الإعتماد علي ذواتهم بشكل كبير فلا يعقل أن شاب يعتبر نفسه صحفي في الدستور و ما زال يأخذ فلوس من والده لأن مرتب الدستور لا يكفي حتي يعيش به. و الأزمة الحقيقية هي أن حتي المحررين المعينيين في الجريدة و لهم عقد يعاملوا بالقطعة ..! تخيلوا إلي جانب أن عقودهم هي بقيمة 150 جنية في الشهرالا ان بعضهم لا يحصلون حتى على هذا المبلغ بعد ان قررت الادارة بموافقة رئيس التحرير خصم قيمة التامينات كاملة منهم ليتم خصم 135 جنيها من كل محرر وهكذا كان بعضهم يفاجىء انه يقبض 15 جنيه اى والله 15 جنيه مرتب تزيد الى 35 جنيه كاملة مع البعض الاخر رغم انهم ممكن ان يكونوا قدموا الكثير من الموضوعات وبتكليف من ادارة التحرير ولم يتم نشرها ورغم انهم يصرفون عليها اتصالات من جيوبهم - أرجوك لا تتعجب الأن فما زال أمامنا الكثير- , تخيل أن صحفي عضو في نقابة الصحفيين و يعمل بجريدة الدستور قد يحصل علي 150 جنية في الشهرلو ربنا كرمه وكان محظوظ وخدهم و هو ما يعني إنه لازم يبات في الشارع حتي يجد رغيف عيش حاف يأكله كل يوم حتي نهاية الشهر إلي جانب رحلة من المشي اليومي توفيراً لنفقات المواصلات, حتي كل هذا الكلام قد يبدو عادي و لكن تخيلوا رد رئيس تحرير الدستور الأستاذ إبراهيم عيسي كان إيه؟! قالها نصاً " شوفوا شغل تاني بره , ما أنا بأشتغل في كذا حته تانية"!!!!!!!!!!!!!!! واللى مش عاجبه يروح يشتغل جنب الصور العريانة فى الفجر مع عادل حموده او عند مصطفى بكرى ومهازله فى الاسبوع
قد يتخيل البعض أن صحفي الدستور قد يصبروا علي ذلك من أجل التعيين في نقابة الصحفيين بما أن الجريدة تحمل رخصة مصرية ,و لكن دعونا نعرض الحقيقة كاملة فالجريدة قامت بتعيين 15 محرر بينهم 6 من المحظوظين كشقيق رئيس التحرير وبعض اصدقائه بعد مرور عام علي صدور الجريدة
ولاحتواء صدمة من رأوا ان البعض تم مجاملتهم على حسابهم وعدت بتعيين عدد آخر في أقرب فرصة و في أحد الأيام قرر الأستاذ عصام إسماعيل فهمي تعيين 12 محرر في خطوة جاءت كرد فعل لترك خالد للجريدة و محاولة إمتصاص غضب المحرريين و لكن و إية يعني المهم إن المحررين يتعينوا ,و جاءت ساعة الحسم عندما دخل المحرريين المبشريين بالتعيين للأستاذ عصام إسماعيل فهمي ليوقعوا علي عقودهم و لكنهم فوجئوا أن العقود كانت غير مؤرخه أو موقعة من قبل الأستاذ عصام فهمي رئيس مجلس الإدارة بالرغم من وجوده معهم و أكتفي بالتصوير مع المحررين المخدوعين , نعم هم مخدوعيين لأنهم لم يحصلوا حتي الأن علي هذه العقود التي وقعوا عليها منذ أشهر مضت رغم ان 2 منهم وهم المضمون ولاءهم لادارة الجريدة حصلوا على العقود دون اى مراعاة للشباب الذين تم التلاعب بمشاعرهم ومشاعر اسرهم بزعم انه تم تعيينهم وهو ما لم يحدث حتى الان و الحجج كثيرة عند الأستاذ عصام و الأستاذ عيسي و كل رجال الدستور الكبار الذين يعلموا أن العقود لن تعطي للمحررين لأن الأستاذ عصام فهمي قد دخل في معركة مع نقابة الصحفيين لأن بنته الأستاذة نهال لم تحصل تدخل النقابة لأنها كما قالت هي بلسانها "أنا شغالة في الإدارة"وكما قال الاستاذ عصام يعنى العيال اللى شغالين عند بنتى يدخلوا النقابة وهى لأ ازاى يعنى المفاجأة ان عيسي كان يعرف أن كل العقود التي وقع عليها المحررين هي ..................... عقود وهمية وظل يتلاعب بهم حتى الأن هذا جزء صغير جداً جداً مما يحدث لمحرري الدستور و أعتقد أن المساحة لا تكفي لنكتب ما يحدث كاملاً, و لكن دعونا نحكي لكم جزءاً آخر .هل يتخيل أي شخص أن التليفون الخاص بجريدة الدستور يفصل كل 3 دقائق !! آه و الله كل ثلاث دقائق حفاظاً علي أموال عصام فهمي , طب أسمعوا دي كمان كل ما يمكن أن يخرج من تليفونات يومياً لمحرري الدستور هو 30 مكالمة فقط ليس للمحررين فقط بل لكل العاملين بالجريدة بما يعني أن فاتورة التليفون لن تتجاوز بأي حال من الأحوال 1000 جنية , تخيلوا أن مؤسسة الدستور التي تبيع 130 ألف نسخة كما يتداول أو 170 الف نسخة كما أعلن أحمد فكري هذا الأسبوع و لكن المحررين يقوموا بإستكمال ما يريدوه من تليفون خالد البلشي - قبل أن يترك المكان- حتي وصلت فاتوة هاتفه الشخصي إلي ما يوازى فاتورة الجريدة التي يعمل بها , و الأن يخرج المحررين للسنترالات لينهوا الشغل المطلوب منهم و يضيفوا عبئاً جديداً علي أعبائهم المادية - تذكروا ا، مرتب المعينيين 150 جنية في الشهر-.
هل صعقتم مما يحدث أم لا ؟ طب هل تعلموا أن ورق الدشت الذي يكتب فيه الصحفيين لم يأتي منذ أسبوع كامل للجريدة و أن الصحفيين يشتروا بأموالهم ورق ليكتبوا فيه مع ان كيلو ورق الدشت جملة ب 3 جنيهات.
هذا ما كان خالدالبلشي يدافع عنه في الجريدة و هذا هو ما يحدث مع محرري الدستور الشباب الذي يعايرهم كبار رجالات الدستور بالتعيين أو حتي بأنهم لهم شرف الكتابة في الجريدة هذا جزء صغير مما يحدث و البقية ستأتي و أتمني من كبار رجالات الدستور أن يدخلوا ليعلقوا علي ما نشرناه و ليثبتوا للجميع أننا مخطئيين و أعلنها اننا سننشر إعتذار كامل عن كل حرف كتبناه علي هذه المدونة و سنمحها كاملتاً إذا أثبتوا كذب قولنا و سننشر قريباً صور من قرار إبراهيم عيسي بتحمل قيمة التأمينات.

ماحدث في الدستور

2006-08-03T14:19:00.000-07:00

الموضوع ببساطة إن الجرنان مش بيدي الناس حقوقهم يعني المحررين بيأخدوا علي دماغهم بدل ما بيأخدوا مرتبات تصور إن المعينيين في المكان بيتحاسبوا بالقطعة و إن اللي مش متعينين بيتم خصم فلوس من مرتباتهم وصلت في بعض الأحيان إلي 400 جنية دون أي تفسير, إلي جانب مكان غير آدمي و معاملات غير آدمية بالمرة يلقاها المحررين داخل الدستور, المهم في وسط كل تلك الإنتهاكات لآدمية العمل كان خالد البلشي بيدافع عن حقوق الناس لأن الناس دي شغالة معاه و الطبيعي إنه يدافع عن حقوقها مش زي ما الناس متخيلة إن ده شيء ما يصحش كما قيل عليه داخل الجرنان , و استمرت محاولات البلشي في الحصول علي أي من حقوق الصحفيين فهو لم يكن يبحث عن رفاهية لههم بقدر ما كان يبحث عن حقوقهم , و قوبلت كل محاولاته بالمط و الوعود علي شاكلت فوت علينا كمان أسبوع حتي طفح الكيل لدي الطرفين و هدد البلشي بترك الجرنان إذا لم يحصل المحررين علي حقوقهم و التي كانت أقلها أن يعرفوا كيف يتم محاسبتهم مادياً , و لكن قبول ذلك بسخط شديد و ترك البلشي الجريدة علي أثر تلك المعركة ليتم بعدها تعيين أحمد فكري رئيساً للقسم و تعيين محمد المعتصم سكرتير للقسم في غفلة من الزمن و يتم بعدها مساومة البلشي علي الرجوع و لكن دون رئاسة قسم التحقيقات , حتي يتم تصفية القسم ممن وصفوا بأنهم تبع شلة خالد و كان المقصود بذلك حوالي ثلاثة أ{باع القسم أما الربع الباقي فهم الموالسيين الذين لم يتركوا أي رئيس قسم و لو كان شارون نفسه إلا و نافقوه , و قالها أحمد فكري بنفسه " أنا جاي عشان أمشي القسم التي تيع خالد و أعمل قسم جديد" , و بعدها بدء إرسال المفاوضيين لإعادة البلشي في سيناريو فاشل و قيل له الكثير من الكلام الذي لا ندري عن صحته شيئاً لأنه نقل علي لسان إبراهيم عيسي لخالد البلشي الذي تعامل بدوره مع الموضوع علي أنه ينتظر مقابلة إبراهيم ليعرف الحقيقة و بالفعل تمت المقابلة و عاد البلشي إلي الدستور و لكن مساعد لرئيس التحرير و مشرف علي قسم التحقيقات و في هذا اليوم قام البلشي بعرض أكثر من 24 فكرة تحقيقات في يوم واحد فقظ مع العلم أن أحمد فكري رئيس القسم الحالي لا يعطي أي أفكار للقسم و لم يعطي أي أفكار طوال فترة تواجده و يكفي أن تلاحظ أن الدستور الأن أصبحت خاليه من أي تحقيق حقيقي يصنعه المحرريين و فيفي تاني يوم بعد عودة البلشي توفي عمه بالمنوفية و ذهب لتلقي العزاء فيه و حدثت مشاجرة بين بعض المحرريين و بين أحمد فكري رئيس القسم قام بعدها أحمد فكري و إبراهيم منصور بتحويل ستة أشخاص للتحقيق و مضوا الورقة باسم إبراهيم عيسي دون أن يكون قد علم بأي شيء , و عندما جاء عيسي كان الجميع قد اشعلوا نار المشكلة و اتصل عيسي بخالد البلشسي ليبلغه بانه في إجازة مفتوحة بدلاً أن يعزيه في وفاة عمه و أعتبر عيسي أن البلشي هو الرأس المدبر للمشكلة التي حدثت بين المحرريين و رئيس القسم و حقيقة المشكلة أن أحمد فكري شاهد أتنين من المحررين يتكلموا فسألأهما عما يتحثا فأجاب أحدهم بسخرية أنها مسألة شخصية فقام فكري بتحويله للتحقيق و لا أدري ما هو دور البلشي في هذه الأزمة هل هو من أجبر فكري أن يسأل ذلك السؤال السخيف الذي لا يحمل أي معني سوي محاولة أن يعيش دور القائد الذي لم يعيشه من قبل, لتبدا سلسلة من المفاوضات السخيفة لإعادة البلشي بأدوار أقل و هو ما رفضه البلشي كما رفض أن يصعد الموضوع لأنه يريد أن يأخذ حقه بدون أي مشاكل, و أرتضاء أن يترك بعد الوسطاء ليتدخلوا , هذا جزء صغير جدا عن ما يحدث في الدستور و أعدكم أن ننشر الباقي كاملا إن شاء الله

البداية

2006-08-03T12:25:00.000-07:00

لم أكن أتخيل أن الأمور في جريدة الدستور قد تصل إلي هذا الحد من البشاعة أبداً فكلنا صحفيين و قراء كنا نعتقد أن الدستور هي حصن الحرية في مصر , و لكن فجأة أكتشفنا أن الحصن كان خشبياً و أن النمل قي تركه هيكلاً فقط ينتظر السقوط في أي لحظه.

و سنبدأ من الأن توضيح حقيقة ما يحدث في الدستور بكل حيادية و البداية ستكون مع الأستاذ خالد البلشي أول المضحي بهم في تلك القلعة

محاولة لضبط حوار هائج على مدونة مصرنا
ادعوا لشهداء قانا بالرحمة
اتصل بي احد الزملاء ليقول لي شوف الخناقة اللي معمولة عشانك على الانترنت ولا استطيع أن أقول لكم كم أحزننى ما وصل إليه مستوى الحوار بين مجموعة من أفضل صحفي مصر و أحزنني أكثر أن هذا يأتي ونحن في فترة الحداد على شهداء قانا فهل يجوز إن نتكلم عن حقوق مادية ومهنية بهذه الطريقة وأطفالنا على الجانب آخر يموتون المؤكد إننا لن نسكت على انتهاك وضياع هذه الحقوق فالصمت على الحقوق الصغيرة هو الذي يفتح الباب لضياع الحقوق الكبيرة لكن ذلك له موعد أخر وطرق أخرى هناك تفاصيل كثيرة حول تجاوزات تحدث في الدستور حول حقوق الصحفيين وكلكم تعرفون صحافة عصام فهمي وما يحدث فيها لكنني أتمنى إلا يأتي اليوم وأتحدث فيها حفاظا على سمعة زملاء كنت اجلهم كثيرا وما زلت احمل الكثير من مشاعر الود والاحترام تجاه كثيرين منهم لكن بعضهم يدفع الأمور للانفجار بل وسعوا لإغلاق كل سبل الحوار الودية رغم تدخل أسماء وقامات كبيرة اسمحوا لي إلا أبوح بها الآن فمازال في الوقت ربما بضع ساعات أو أيام قبل إن أتكلم ومن حق كل من تدخلوا إن أعود إليهم أولا وإذا رأوا إن الصمت هو الأفضل سأصمت ولكن كل المؤشرات لا تبشر بذلك بل إن بعضهم وعدني بالمساندة وبعضهم يرى انه لا سبيل الي الصمت لأن القضية قضية حقوق إما الصغائر فأرجوكم إن تتجاوزوا عنها
و شكرا لكل من وقفوا بجانبي وساندوني وشكرا للصديقة العزيزة عبير العسكري لأنها سعت لضبط الحوار إما وقوفها جانبي فله حديث أخر رغم إن الثمن الذي دفعته كان غاليا وعز من يستغنون عن إعمالهم في هذا الوقت لمجرد نصرة الحق وحتى للدفاع عن موقف يراه مبدئيا فهذا ليس غريبا عليها والدستور نفسها شهدت بذلك عندما كتبت " عبير العسكري من عندنا "وشكرا للزميل الفاضل بلال فضل أيضا انه سعى لإعادة الحوار الي دائرة الانضباط رغم انحنى اعتب عليه انه من خلال قرائتى اليوم للتعليقات انه ساهم دون قصد في إشعالها من خلال تلسينات غير مسئولة عن أطراف أخرى في الحوار لا ناقة لها ولا جمل فيما يحدث على هذا الموقع رغم إن هذا ليس محله ورغم إن اتصال تليفوني منك لي ولو حتى لتقول لي البقية في حياتك كان كفيل بحل الكثير وربما ساهم فى تهدئة الأمور داخل الدستور لكن عذرك إن ما فعلته فعله آخرون كانوا مقربين لي داخل الدستور وكأن الدفاع عن حقوق الناس في هذا الزمان أصبح تهمة ولكن يكفيني وقوف كل الزملاء الذين دافعت عن حقوقهم جانبي ويكفيني مساندات قوية جاءت من عمرو سليم و خالد كساب وإيهاب عبد الحميد وخالد إسماعيل ومحمد الدسوقي وكثير من رسامي قسم الكاريكاتير إما الزملاء في قسم التحقيقات فلهم حديث أخر حتى لا يضار احد منهم بموقفه فهذا وقت الترحم على شهداء قانا ووقت توفير الجهد لمساندة الشعب اللبناني في وقت باعه حكامنا فكان لزاما علينا إن نكفر عن خطاياهم وخطايا صمتنا عنهم وهذه دعوة صادقة لكم جميعا إن نبذل جهدنا من اجل ذلك وأتمنى إلا يدفعني احد للحديث في وقت غير مناسب رغم أنهم يصرون على ذلك ويبقى الشيء المؤكد أنني لن اصمت على حقوق الزملاء وحقوقي لو استمر الإصرار على انتهاكها ادعوا معي لأطفال وشهداء قانا بالرحمة ولمظاليم الدستور بان ينالوا حقوقهم ولمنتهكي حقوقهم ومن ساهموا في انتهاكها بالهداية

خالد البلشى
صحفي

حقيقة ما يحدث في الدستور

2006-08-03T11:49:00.000-07:00

انشئنا هذه المدونة لتعرفوا حقيقة ما يحدث في جريدة الدستور"الحقيقة الكاملة بدون تزوير"